2015 жылғы Еуропа чемпионатына іріктеу кезеңі аясында Қазақстан құрамасы (21 жасқа дейінгі) Франция жастар құрамасынан ойсырай жеңілді, - деп хабарлайды Vesti.kz.
Елордамыздағы "Астана-Арена" стадионында өткен кездесу 5:1 есебімен қонақтардың пайдасына аяқталды. Француздар сапынан Яя Саного мен Лайвен Курзава дубль авторлары атанса, Морган Сансо бір допты еншісіне жазды. Ал Қазақстан құрамасының жалғыз добын 36-минутта "Шахтер" шабуылшысы Роман Мұртазаев соқты.
Осылайша футболдан Қазақстан жастар құрамы Еуропа біріншілігінің іріктеу кезеңін тоғыз ұпаймен аяқтады. Қазірше біздің құрама 10-топтағы бес команданың ішінде үшінші орында тұр. Ал барлық кездесулерінде жеңіске жетіп, 21 ұпай жинаған Франция құрамасы бірінші орында.
