28 сәуір 2017 | 15:33

Алматылықтар сумен алысқан түн

<p>Жергілікті тұрғындардың сөзінше, 23:15-де су көптеп келе бастаған.</p>

Алматыда сәуірдің 28-не қараған түні толассыз жауған жауын салдарынан көптеген үй су астында қалды. Облыстық ТЖД мәліметінше, құбыр өткізгіштері қоқыспен бітеліп қалған, салдарынан өзеннің кей тұстарында су деңгейі көтерілген. Қарасай ауданын, Райымбек ауылын, "Ақсай-19", "Торпеда", "Труд" саяжай қоныстарын су басқан. Тengrinews.kz тілшісі судан зардап шеккен аудандардың бірінде болып, болған жайтты өз көзімен көріп қайтты.

Судың көп болғаны соншалық, тас қоршаулар да шыдас бермеген.

Үйдің иесі, Ауған соғысының ардагері Бақытқали Оразбайұлы түндегі су деңгейінің қандай болғанын көрсетіп тұр.

Бақытқали алғашында отбасын алып, қауіпсіз жерге кетпек болғанымен жиналған судан қақпаны аша алмағанын айтады. Кейін көршілері келіп, жабыла ашқан кезде көлік оталмай қалған. Осыдан кейін ол өз күшімен жертөледегі суды таңғы беске дейін тазалағанын айтады.

Бұл көшедегі 20 шақты үйдің барлығы дерлік осындай жағдайда.

Арнасына шығып кеткен мына бір кішкентай ғана тау өзені.

Көше тұрғындары былтыр өз қаржысына көшеге тасжол төсегенін айтады.

Ауласына су жиналып қалған тұрғындар амалсыз бетон қоршауын бұзуға мәжбүр болған.

Құтқарушылар жертөледегі суды тазалау үстінде.

Бұл үйдің тұрғыны Гүлнұр Сұлтанова жертөледегі тұрмыс техникасы мен жиһазының бүлінгенін айтып отыр.

Үй күзететін төбет иттің өзі де болған жайттан абдырып, үрер-үрмесін білмей тұр.

Әкімдік өкілдері тұрғындардың сұрағына жауап беріп тұр.

Бұл үйдің иесі Данаев Асхат та жиналып қалған судан құтылу үшін қоршауын бұзған.

Маңындағы көмекшілерімен бірге жертөлеге жиналып қалған лайды тазалап жатыр.

"Түнде далаға бір шықтым, жаңбыр қатты жауып жатыр екен. Бір зат алуға кіріп, бес минуттан кейін шыққанымда су деңгейі белден келіп тұрды. Қарасам иттерім суда жүзіп жүр", - дейді Асхат.