07 қаңтар 2015 | 17:24

Суретші жасаған жаңа әліппе

Смартфондарға арналған қосымшада әліппені үйренуге баулитын ән болады. ©Аңсаған Мұстафа

Қазақстандық суретші Аңсаған Мұстафа балаларға арналған жаңа әліппе ұсынды. Автор бұл әліппенің сенсорлы экраны бар гаджеттерге қосымша ретінде де жасауды жоспарлап отыр. Аңсаған Мұстафа өз мақсатының қазақ балаларына қазақша үйрету, қазақша тіл ашу, қазақша ойлату екенін айтады. "Қазір елдің бәрі Интернетте, кітапты ешкім көп қарамайды, сондықтан iPad, iPhone-дармен ойын ойнайды. Ал егер ұялы телефонда қазақша дүние болса амалсыз үйренеді. Жалпы әлемде мұндай дүниелер әлем тілдерінде көп, қазақ тіліміз де елден қалмасын деген ниетпен жасап отырмыз", - дейді Мұстафа. Сонымен қатар, суретші бұл жобаны балаларға арналған отандық телеарнаға тегін бергісі келетінін айтты.

Балаларға арналған жаңа әліппенің сөзін журналист Мәдина Дүйсекеева жазды. ©Аңсаған Мұстафа

Бұл сөзге ән де жазылған, оның авторы - композитор - Ринат Әбдіхалықов. ©Аңсаған Мұстафа

Әнді опера әншісі Сара Найман орындамақшы. "Мен де бұл идеямен қазақша әліппе мултьфильмін жасағым келеді. Балалар өте тез үйренеді, ал мультфильм мен ән арқылы жылдам меңгереді. Менің балам екі жасында ағылшын және неміс әліппелерін екі жасында-ақ біліп алды", - дейді Сара Найман. ©Аңсаған Мұстафа

IT-маман Тимур Бектұр әліппенің қосымшасын жасап шығуға келісім берген. "Тек бір ой бар - әліппені осы суреттер негізінде 2-3 және 4-5 жастағы балаларға екі бөлек нұсқада дайындау. Мұнымен қатар, бір ерекшелігі әліппенің тақпақпен берілетінінде", - дейді Тимур Бектұр. ©Аңсаған Мұстафа