+7 (777) 001 44 99
Қазақша
Русский
English
Жуалы ауданы Күреңбел ауылында ауыз су жүйесін жаңарту және кеңейту жұмыстары басталып, ауыл тұрғындарының өмір сүру сапасын жақсартуға бағытталған маңызды жоба іске асырылуда. Бұл жұмыстар – тұрғындарды сапалы әрі үздіксіз ауызсумен қамту мақсатындағы жүйелі бастамалардың бірі.
Қазіргі таңда құрылыс алаңында су құбырларын тарту, жаңа су желілерін орнату жұмыстары қарқынды жүріп жатыр. Құрылыс жұмыстары бірнеше кезеңмен жүзеге асырылып, жақын арада ауылдың барлық бөлігін қамтитын болады. Жоба аяқталған соң, Күреңбел ауылы толықтай таза әрі қауіпсіз ауызсумен қамтылады деп күтілуде.
Жергілікті халық бұл өзгерістерді қуанышпен қабылдап, ауылдың дамуы үшін жасалып жатқан нақты қадам ретінде бағалауда. Ауызсудың қолжетімді болуы – тұрғындардың денсаулығы мен тұрмысы үшін аса маңызды.
Күреңбел ауылындағы жұмыстар – елді мекендердің инфрақұрылымын жақсарту жолындағы нақты жетістіктердің бірі. Ауыл әкімдігі тарапынан алдағы уақытта да халықтың тұрмыс жағдайын жақсартуға бағытталған жұмыстарды жалғастыру жоспарлануда.
Суреттер: Жамбыл облысы әкімінің баспасөз қызметі
Айта кетейік, бүгінгі таңда облыстағы 371 елді мекеннің 97% сапалы ауыз сумен қамтылған. Жамбыл облысы тұрғындарын таза ауыз сумен қамту – басты басымдықтардың бірі болғандықтан, жыл соңына дейін 100% сапалы ауыз сумен қамтамасыз ету жоспарлануда.
