+7 (777) 001 44 99
Қазақша
Русский
English
Ауыл жастарына арналған квота бойынша аграрлық жоғары оқу орындарын бітірген түлектер 2020 жылдан бастап ауылдық жерлерде 3 жыл жұмыс істеуге міндетті болады, - деп хабарлайды Tengrinews.kz тілшісі Ауыл шаруашылығы министрлігінің баспасөз қызметіне сілтеме жасап.
Ведомство мәліметінше, министрлік ауыл шаруашылығы саласы үшін мамандар даярлауға қатысты ұлттық заңнамаға бірқатар түзету енгізді. Биыл 28 қазанда Мемлекет басшысы тиісті заңға қол қойған болатын.
"Жаңа заң бойынша ауылдық квотамен ауыл шаруашылығы мамандықтарында оқыған ЖОО-ның түлектері ауылдық жерлерде кемінде 3 жыл жұмыс істейді. Заңнаманы өзгерту, шын мәнінде, мемлекет есебінен жоғары немесе жоғары оқу орнынан кейінгі білім алған ауыл жастарын аграрлық бейіндегі ұйымдарда кепілді түрде жұмысқа орналасуына мүмкіндік береді.
Министрлік бұл шара ауыл шаруашылығы тауарын өндірушілердің кәсіби кадрларға деген сұранысын арттыруға мүмкіндік береді деп санайды. Жаңашылдық жастарды жұмыспен қамтамасыз ету мәселелерін шешеді. Сондай-ақ, ауылдық жерде "ауыл шаруашылығы мамандығы" бойынша мүлде жұмыс істеуді жоспарламаған талапкерлердің "ауылдық квотамен" мемлекеттік грантқа түсуіне жол бермейді", - деді министрлік өкілдері.
