19 наурыз 2015 | 23:36

Ақордада Назарбаев пен Лукашенко кездесті

Александр Лукашенко мен Нұрсұлтан Назарбаев. Фото: akorda.kz

Ақордада Қазақстан Президенті елімізге жұмыс сапарымен келген Беларусь Республикасының президенті Александр Лукашенкомен кездесті, - деп хабарлайды Тengrinews.kz тілшісі Мемлекет басшысының баспасөз қызметіне сілтеме жасап.

Ақордада Қазақстан Президенті елімізге жұмыс сапарымен келген Беларусь Республикасының президенті Александр Лукашенкомен кездесті, - деп хабарлайды Тengrinews.kz тілшісі Мемлекет басшысының баспасөз қызметіне сілтеме жасап.

Кездесу барысында мемлекет басшылары сауда-экономика, инвестиция, өнеркәсіп және ауыл шаруашылығы салаларындағы ынтымақтастықты қамтитын Қазақстан-Беларусь қарым-қатынасының негізгі мәселелерін талқылады. Сондай-ақ Нұрсұлтан Назарбаев пен Александр Лукашенко халықаралық күн тәртібіндегі өзекті жайттар жөнінде пікір алмасты.

Қазақстан Президенті екіжақты ынтымақтастық аясында елдеріміз қол жеткізген барлық уағдаластықтар табысты орындалып жатқанын атап өтті. Осыған байланысты Мемлекет басшысы екі елдің көптеген бірлескен кәсіпорындары жұмыс жүргізіп жатқанына назар аудара келіп, бұл істің алдағы уақытта да жалғасатынын айтты.

Нұрсұлтан Назарбаев сондай-ақ Беларусь президентінің Украина дағдарысын реттеу ісіндегі үлесіне тоқталып өтті. "Болып отырған тайталастың ешкімге пайда бермейтіні жөніндегі біздің ұстанымдарымыз толығымен үндеседі", – деді Мемлекет басшысы.

Қазақстан Президенті үш мемлекет басшысының алдағы кездесуі ынтымақтастықтың қазіргі кездегі өзекті және перспективалық мәселелерін талқылауға мүмкіндік беретінін айтты. Лукашенко өз кезегінде екіжақты сауда-экономикалық өзара іс-қимылды бұдан әрі дамытудың маңыздылығын атап өтті. Беларусь президенті Қазақстандағы алда тұрған президент сайлауының жайына тоқталды. "Қазақстан халқы Сізге зор ілтипатпен және ерекше жылылықпен қарайтынын білемін. Біздің де Сізге деген көзқарасымызды білесіз. Біз Сізге тілекшіміз және жеңіс тілейміз", – деді Лукашенко.

Еске салайық, 20 наурыз күні Астанада Қазақстан, Беларусь және Ресей президенттерінің үшжақты кездесуі өтеді. Мемлекет басшылары үш елдің өзара сауда және экономикалық ықпалдастығын тереңдету мәселелерін қарастырады. Сонымен қатар президенттер әлемдік экономиканың даму үрдістерін және Украинадағы ахуалды талқылайды.