Ақтауда 18 және 19 шілде күндері жүргізушілер сұйытылған газ тапшылығы мен автогаз құю бекеттеріндегі бірнеше сағатқа созылған кезектерге тағы да шағымданды, деп хабарлайды Tengrinews.kz тілшісі Lada.kz басылымына сілтеме жасап.
Әлеуметтік желілерде жүргізушілер жанармай құю үшін кезек күтіп тұрған ондаған көлік түсірілген видеоларды жариялап жатыр. Олардың айтуынша, бірнеше айдан бері жалғасып келе жатқан мәселе әлі күнге дейін шешілмеген.
"Газ әлі де тапшы. Қалада да, сыртында да ұзын-сонар кезек. Кейбір автогаз құю бекеттерінде өз кезегіңді бірнеше сағат күтуге тура келеді. Көптеген бекет мүлде жабық, ал кезек жоқ жерлерде газ тек талонмен беріледі. Бүгін өзім екі сағат кезекте тұрдым. Неліктен билік жаздың екі айында бұл мәселені шеше алмады?" – дейді Ақтау тұрғыны.
Жүргізушілердің сөзінше, газ сатылып жатқан бекетті іздеудің өзі кейде бірнеше сағатқа созылады.
"Кеше кешке бірнеше автогаз құю бекетін араладық, бірақ газ таба алмадық. Бүгін таңертеңнен бері кезекте 25–30, тіпті одан да көп көлік тұр. Күн сайын бір көрініс. Адамдар көлігіне газ құю үшін бірнеше сағатын жоғалтады, ал кейбірі отыны таусылып, ештеңесіз қайтып кетеді. Бұл мәселе ешкімді алаңдатпайтын сияқты", – дейді жүргізушілердің бірі.
Ал Ақтау қаласының әкімдігі жағдай тұрақты бақылауда екенін айтып, ахуалды тұрақты деп бағалады.
"Ақтаудағы автогаз құю бекеттерінде сұйытылған мұнай газының сатылуына күн сайын мониторинг жүргізіледі. 2026 жылғы 19 шілде сағат 12:00-дегі мәлімет бойынша, қалада 32 автогаз құю бекеті жұмыс істеп тұр. Тексеру барысында барлық жұмыс істеп тұрған бекеттерде сұйытылған мұнай газының бөлшек сауда бағасы литріне 72 теңге екені анықталды. Қала сыртындағы бекеттерде кезек айтарлықтай көп емес. Орта есеппен жұмыс істеп тұрған бекеттерде 3-тен 17-ге дейін көлік күтіп тұр, ал кейбір бекеттерде кезек мүлде жоқ", – деп хабарлады әкімдік.
Lada.kz тілшісінің "Ресми мониторингке қарамастан, тұрғындар неге бірнеше сағаттық кезек туралы айтып жатыр?" деген сауалына әкімдік жағдайдың күн ішінде өзгеріп отыратынын айтты.
"Біз күн сайын мониторинг жүргіземіз, ал автогаз құю бекеттеріндегі жағдай үнемі өзгеріп тұрады. Кейбір бекеттерде қызметкерлер түскі үзіліске шығады, кейбірінде бір ғана оператор жұмыс істейді, сондықтан көлік ағынына үлгермей жатады. Осы себепті кезек бірнеше сағаттың ішінде-ақ өзгеруі мүмкін. Біз жариялайтын ақпарат мониторинг жүргізілген сәттегі жағдайды ғана көрсетеді", – деп түсіндірді әкімдік.
Әкімдік автогазбен қамтамасыз ету мәселесі бақылауда екенін айтып, тұрғындарды тек ресми ақпаратқа сүйенуге шақырды.
Еске салайық, бұған дейін Энергетика министрлігі Қазақстанда, оның ішінде Маңғыстау облысында сұйытылған мұнай газының тапшылығы жоқ екенін мәлімдеген болатын. Ведомствоның мәліметінше, жекелеген жанармай бекеттеріндегі кезектер логистикалық мәселелерге байланысты туындаған, ал газ жеткізу жұмыстары уақытылы жүргізіліп жатыр.