Синоптиктер алдағы күндерге ауа райы болжамын жария етті, - деп хабарлайды Tengrinews.kz тілшісі "Қазгидромет" РМК өкілдеріне сілтеме жасап.
Синоптиктердің мәліметінше, ертең, 4 наурызда Алматы, Жамбыл, Оңтүстік-Қазақстан, Қызылорда облыстары бойынша жауын-жашын (жаңбыр басым), кей жерлерде қатты түсуі болжанады. Осыған байланысты қар еріп, мұздық құбылыстардың әлсіреп өзен арналары қысылып, жазықтық жерлерде және таулы өзендерде беткейлі ағынның пайда болуы мүмкін.
"4-5 наурызда Атырау, Батыс Қазақстан облыстары бойынша қысқа мерзімді күндізгі ауа температурасының 5 градусқа жоғарылауы, жауын-шашын (қар, жаңбыр) түсуі күтілуде. Осыған байланысты қар еріп, мұздық құбылыстардың әлсіреп өзен арналары қысылып, жазықтық жерлерде ағынның пайда болуы мүмкін.
Ал 6-7 наурызда Қарағанды, Ақмола, Солтүстік Қазақстан, Павлодар облыстарында қысқа мерзімге ауа температурасы күндіз 5 градус жылыға дейін, Шығыс Қазақстан облысында 3, 8 градус жылыға дейін жоғарылайды. Осыған байланысты қар еріп, мұздық құбылыстардың әлсіреп өзен арналары қысылып, жазықтық жерлерде және таулы өзендерде беткейлі ағынның пайда болуы мүмкін. Су деңгейлері көтеріліп су басуы мүмкін", - деді "Қазгидромет" мамандары.
Сондай-ақ, 1 наурыздағы жерді қашықтықтан зондтау (ЖҚЗ) суреттері бойынша Қарағанды, Ақмола, Солтүстік-Қазақстан, Павлодар облыстары территориясының 99 пайызында, Шығыс Қазақстан облысында 92 пайызында қар жамылғысы жатқаны айтылады.
