Алматыда белгілі педагог Әбдімәжіт Өтеш көз жұмды, - деп хабарлайды Tengrinews.kz тілшісі. Бұл туралы № 178 мектеп-лицейінің дирекциясы мәлімдеді.
Мектеп қызметкерлерінің мәліметінше, Әбдімәжіт Қоңырбайұлы жүрек сырқатынан көз жұмған. Ол 59 жаста болатын. Біраз уақыт бұрын ол ауруханаға жатқызылған еді. Алматының Білім басқармасы бұл ақпаратты растады.
№ 178 мектеп-лицейі Ақбұлақ ықшамауданында "Арзан" сауда орталығының артында орналасқан. Әбдімәжіт Өтештің еңбегі арқасында физико-математика бағытындағы мектеп қала бойынша ғана емес, республика бойынша да алдыңғы қатарға кірген.
Әбдімәжіт Өтеш - Республикалық физико-математика мектебінің (РФММ) 1974 жылғы түлегі. 1997 жылдан 2000 жылдар аралығы осы мектептің директоры болған.
