+7 (777) 001 44 99
Қазақша
Русский
English
Қазақша
Русский
English
Алматы әкімдігі қаладағы көлік кептелісі мәселесін шешу үшін жұмыс кестесі өзгере ме деген сұраққа жауап берді, - деп хабарлайды Tengrinews.kz тілшісі.
"Алматыда көлік ағыны шамадан тыс екенін ескерсек, жұмыс күнінің басталу уақытын ауыстыру мүмкіндігі қарастырылып жатыр ма? Егер қарастырылса, қандай ұйымдарға және қай уақытқа?" – деп Tengrinews.kz тілшісі ресми сауал жолдаған еді.
Әкімдіктің баспасөз қызметі мынадай жауап берді:
"Қоғамдық көлік қозғалысының кестесіне, оның ішінде жұмыс уақытының басталуына өзгерістер енгізу әзірге қарастырылып жатқан жоқ", – делінген хабарламада.
Ал қарбалас уақыттардағы кептеліс мәселесін шешу жолдарына қатысты әкімдік мынадай ақпарат ұсынды:
"Алматы агломерациясын 2024-2028 жылдар аралығында дамыту жөніндегі кешенді жоспар Үкімет тарапынан бекітілді. Бұл құжат Алматы мен оған іргелес аудандардағы әлеуметтік, инженерлік және көлік инфрақұрылымын үйлестіру мен теңгерімді дамытуға бағытталған.
Сонымен қатар, Алматы әкімдігі көлік кептелістерін азайтуға бағытталған кешенді стратегияны жүзеге асырып жатыр. Оған қоғамдық көлікті дамыту, қалалық инфрақұрылымды жақсарту және жеке автокөліктерді пайдалануды азайтуға ынталандыру шаралары кіреді", – деп хабарлады әкімдік өкілдері.
Айта кетейік, бұған дейін Шығыс Қазақстан және Алматы облыстарында жұмыс күнінің басталу уақыты өзгертілген болатын. Астанада бұл жүйе 2024 жылдың тамызынан бастап енгізіледі деп жоспарланып отыр.
16 маусымнан бастап Алматы облысындағы мемлекеттік органдар жаңа жұмыс кестесіне көшті. Енді жұмыс күні сағат 08:00-де басталып, 17:30-да аяқталады, түскі үзіліс сағат 12:30-дан 14:00-ге дейін.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
