+7 (777) 001 44 99
Қазақша
Русский
English
Алматыда 17 маусымда Райымбек даңғылы мен Механическая көшелерінің қиылысындағы жанар-жағармай құю бекеті аумағында жылу трассасы жарылды. Оқиға куәгерлері жер астынан атқылаған "фонтанды" видеоға түсіріп алған, - деп хабарлайды Tengrinews.kz тілшісі.
Алматы жылу-энергетикалық кешені мен тұрғын үй-коммуналдық шаруашылығының ресми өкілі Ян Гирин құбырдың жарылу себебін атады, сонымен қатар атқылаған судың температурасы 60-65 градустан аспағанын атап өтті. Оның айтуынша, ол адамдардың өміріне, денсаулығына және мүлкіне қауіп төндірмейді.
"Бүгін таңғы сағат 05:30 шамасында қалалық жылу желілерін алдын ала жарияланған жоспарлы гидравликалық сынақтан өткізу кезінде Райымбек даңғылы мен Механическая көшесі қиылысына жақын жерден өтетін магистральдық құбыр учаскелерінің бірі жарылды.
Диаметрі 700 миллиметр құбырдың екпінін шұғыл тәртіппен "Алматы жылу желілері" ЖШС апаттық бригадасы оқшаулады, ол зақымдануды жоюға кірісті. Алдын ала мәліметтер бойынша, жарылыстың себебі - 1966 жылы пайдалануға берілген құбырдың тозуы", - деп түсіндірді Ян Гирин.
Сондай-ақ, ол оқиға салдарынан зардап шеккендер жоқ екенін атап өтті.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
