Алматыдағы Наурызбай ауданының тұрғындары өздерін нағыз қалалық сезінетін болды, - деп хабарлайды Tengrinews.kz тілшісі қала әкімінің баспасөз қызметіне сілтеме жасап.
Баспасөз қызметінің мәліметінше, бүгін, 10 сәуірде Алматы әкімі Ахметжан Есімов Наурызбай ауданының аумағын толығымен жоспарлау жобасын мақұлдады. Салынатын әкімшілік-іскерлік, тұрғын үй, сауда-өндірістік және қоғамдық маңызы бар нысандардың макеттері әкімге көрсетілді.
"Ауданның 153 гектар жеріне биік тұрғын үйлер, білім және денсаулық сақтау нысандары, соның ішінде әрқайсысы 1200 орынды 4 мектеп, 320 орынды 9 балабақша салынады. Бұлардан өзге, елімізде теңдесі жоқ агрокешен де осы аудан аумағына орналасады", - делінген хабарламада.
Айта кетейік, Алматы әкімі бірінші кезектегі шараларды жүзеге асырып, әлеуметтік-мәдени маңызы бар нысандарды салудың негізгі міндет екенін айтты.
"Таяудағы міндет - аудан тұрғындарының өздерін нағыз қалалықтар ретінде сезінулеріне қол жеткізу. Ол үшін бізге сапалы инфрақұрылымды дамыту қажет. Алдағы басты мақсат - Наурызбай ауданын Алматыдағы нағыз заманауи және жайлы ауданның біріне айналдыру, оған толық мүмкіндік бар, біз оны алғашқы қазығын қағудан бастап салудамыз", - деді Ахметжан Есімов.
Баспасөз қызметінің мәліметі бойынша, ауданда бұрыннан бар жолдар қайта жасалып, жаңа жол-көше желісі салынады. Көпшілік пайдаланатын жерлерге ашық автотұрақтар мен "смарт-паркингтер" орналасады. Аудан аумағын көгалдандыруға ерекше маңыз беріледі. Алдын-ала есептеулер бойынша, жобаны жүзеге асыру мерзімі 3 жылды құрайды.
Еске сала кетейік, 2014 жылы шілдеде Алматы қалалық мәслихатының кезекті сессиясында мегаполистің жаңа әкімшілік-территориялық бірлігі - Наурызбай ауданын құру туралы шешім қабылданған болатын. Мегаполистің сегізінші ауданы болып саналатын бұл аумақта 180 мыңнан аса адам тұрады.
