+7 (777) 001 44 99
Қазақша
Русский
English
Астана қаласының ІІД жергілікті полиция қызметі тиесілі аумақтан құрылыс қоқыстарын уақытында шығармағаны және құрылыс материалдарын қоймалағаны үшін, сондай-ақ, Сығанақ көшесінің бойымен қоршаудың жоқтығына байланысты "Казахдорстрой" құрылыс компаниясын әкімшілік жауапкершілікке тартты, - деп хабарлайды Тengrinews.kz тілшісі Астана қаласының ресми сайтына сілтеме жасап.
Белгіленген ережелердің талаптарын елемегені үшін компания 100 айлық есептік көрсеткіш немесе 226 900 теңге көлемінде айыппұл төлеуге тиіс.
Қазіргі уақытта Астанада ІІД ЖПҚ мен аудан әкімі аппараттары өкілдерінің құрылыс алаңдарын және учаскелерді қаланы абаттандыру ережелерінің талаптарына сәйкестігін тексеру бойынша күнделікті бірлескен рейдтері жалғасуда.
Атап айтқанда, рейд барысында Town House құрылыс компаниясының тағы да ереже бұзғаны анықталды. Құрылыс материалдарын үйгені және қоршауының белгіленген нормалар мен талаптарға сәйкес келмегені үшін компанияға 113 450 теңге көлемінде айыппұл салынды.
"2017 жылдың қаңтарында ғана ӘҚБК 505-бабы ("Абаттандыру ережелерін бұзу") бойынша 26 құрылыс ұйымы жауапқа тартылды. Салынған айыппұлдың жалпы көлемі 1 610 990 теңгені құрады. 2016 жылдың қорытындысы бойынша 306 құрылыс компаниясына 18 707 120 теңге айыппұл салынды", - деп хабарлайды сақшылар.
