+7 (777) 001 44 99
Қазақша
Русский
English
Астана қаласының Табиғи ресурстар және табиғат пайдалануды реттеу басқармасы пилоттық жобаны жүзеге асыра бастады, - деп хабарлайды Tengrinews.kz тілшісі қала әкімдігінің сайтына сілтеме жасап.
"Жоба аясында 2014 жылдың 1 желтоқсанынан бастап қала аумағында жеке секторларда күлді арнайы контейнерлерге жинау мен оны полигонға шығару жұмыстары жүргізілді. Күл жинаудың аталмыш тәсілі қоқыс контейнерлерінің, қоқыс таситын техниканың өртенуінің алдын алады және халықтың қоқыс тастау мәдениетін қалыптастырады", - делінген баспасөз хабарламасында.
Айта кетейік, елордада 75 контейнер, әр ауданда 25 контейнерден орнатылған. Сәуір айының 1 мен 25 аралығында коммуналық қызмет өкілдері қала аумағынан 23 тонна 340 келі күл шығарды, ал жоба жүзеге асырыла бастаған сәттен бері 600 тоннадан астам күл шығарылған болатын. Қала әкімдігінің өкілдерінің айтуынша, жоба алдағы уақытта да жалғасын табады және арнайы контейнерлер орнатылады.
Астанада күл шығарудан өзге қатты тұрмыстық қалдықтарды шығару бойынша да жобалар іске қосылған. Соның аясында 1 наурыздан бастап елорданың 36 тұрғын үйі мен 17 ПИК-те арнайы қоқыс контейнерлері орнатылған, - делінген хабарламада.
