Сеніп тапсырылған мүлікті аса ірі көлемде талан-таражға салды деп айыпталған Астана Мәдениет басқармасының бұрынғы басшысы Болат Мажағұлов сотта соңғы сөзін айтты, - деп хабарлайды Tengrinews.kz тілшісі.
Ол өзіне тағылған айыптарды толықтай жоққа шығарды.
"Бұның бәрі ойдан құралған, ешқандай дәлелсіз. Мен өзімді кінәлі сезінбеймін. Одан бөлек, сотта менің кінәсіз екенім толық дәлелденді. Мен ешқашан сынбаймын. Мен ақиқатымды соңына дейін дәлелдеймін, себебі балаларым үшін керекпін. Маған қарсы барлық айыптау сөз жүзінде айтылған. Іс материалдарында менің есепшотыма ақша аударылғаны немесе менің заңсыз байығаным туралы ешқандай дәлелдер жоқ. Барлық банктік есепшоттар тексерілді, заңсыз жолмен сатып алынған мүлік табылған жоқ", - деді Мажағұлов соңғы сөзінде.
Сот үкімінің жариялануы бүгін сағат 15:00-ге жоспарланған.
Еске салайық, прокурор Астана мәдениет басқармасының экс-басшысы Болат Мажағұловқа аса ірі көлемде сеніп тапсырылған мүлікті жымқырды деп айыптап, 10 жыл бас бостандығынан айыруды сұраған болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!