Атырауда ауа сапасы он есеге дейін нашарлап кеткен

Фото ©️ Турар Казангапов

Кейінгі күндері Атырауда ауа сапасы күрт нашарлап, лас заттардың шекті мөлшері бірнеше есеге артқан, - деп хабарлайды Tengrinews.kz тілшісі "Ақ Жайыққа" сілтеме жасап.

Кейінгі күндері Атырауда ауа сапасы күрт нашарлап, лас заттардың шекті мөлшері бірнеше есеге артқан, - деп хабарлайды Tengrinews.kz тілшісі "Ақ Жайыққа" сілтеме жасап.

Экология департаментінің мәліметінше, 17-18 наурыз күндері №17 ластаушы бақылау бекеті мен №114 "Загородная" атмосфералық ауа сапасын бақылау станцияларында күкіртсутектің мөлшері рұқсат етілген шектен 1-4 есеге дейін асып түскен. Сол күндері жел оңтүстік-батыс және батыс бағыттарда соғып, жылдамдығы 2-7 м/с аралығында болды.

"18-19 наурыз күндері "АМӨЗ ЖШС-не тиесілі "Мирный" станциясында күкіртсутек мөлшері 4 есе, "Перетаска" станциясында 1 есе, №103 "Шағалада" 5 есе, 109 "Восток" станциясында 8 есе, №111 "Жилгородок" станциясында 4 есе, №112 "әкімдікте" 10 есе, №113 "Авангард", №114 "Загородная" және №5 "Құрсай" станцияларында 1-5 есеге дейін артқаны анықталған", - деп жазылған хабарламада.

18-19 наурыз күндері қаладағы қолайсыз экологиялық жағдайға байланысты Атырау облысының экология департаменті, санитариялық-эпидемиологиялық бақылау департаменті және "Қазгидромет" РМК бірлесіп, ауа сапасына мониторинг жүргізген.

Сынамалар "Квадрат" булану алаңында, Атырау қаласының 5 шақырым аумағында, "ҚазТрансОйл" АҚ-ның оңтүстік беткейіндегі санитариялық қорғау аймағынан тыс жерде, сондай-ақ, "Атырау мұнай өңдеу зауытының" санитарлық қорғау аймағынан тыс жерлерде алынған.

"Зерттеу барысында ауадағы күкіртсутек (H₂S), көмірсутек (C₆-C₁₀) және бензол (C₆H₆) мөлшері тексерілді. Нәтижесінде "Квадрат" булану алаңында рұқсат етілген шектен асу дерегі тіркелді", - деп жазылған хабарламада.

"19 наурызда сағат 05:00-05:20 аралығында №111 "Жилгородок" станциясында күкіртсутек мөлшері 11 есеге, ал №112 "әкімдік" станциясында 10,7 есеге артқаны анықталды", - деді департаменттің баспасөз қызметі өкілі.

Экология департаменті қаладағы ірі кәсіпорындардың экологиялық заңнама талаптарын сақтауына қатысты жоспардан тыс тексеріс тағайындады.

Сілтемесіз жаңалық оқисыз ба? Онда Telegram желісінде парақшамызға тіркеліңіз!