+7 (777) 001 44 99
Қазақша
Русский
English
Қазақша
Русский
English
ПОДЕЛИТЬСЯ
Астанада әйелін тірідей өртеп жіберген атышулы Қанат Сәдуовтің балалары әкесінен алимент төлеуді талап етті, - деп хабарлайды КТК телеарнасы.
Астанада әйелін тірідей өртеп жіберген атышулы Қанат Сәдуовтің балалары әкесінен алимент төлеуді талап етті, - деп хабарлайды КТК телеарнасы.
Жантүршігерлік қылмысы үшін сотталып кеткен Қанат Сәдуовтің балалары көмекке мұқтаж. Жетім қалған төрт бала нағашы апасының қарауында Қызылжарда жүр. Сот Сәдуовті әкелік құқығынан айырып, балаларына 11 миллион теңге материалдық шығын өтеуді міндеттесе де, екі жылда олар бір тиын алмапты. Алимент те 3 миллионға жеткен. Алайда қылмыскер түрмеде жұмыстан үзілді-кесілді бас тартып, жанын күтетін көрінеді. Ал заң бұл ретте дәрменсіз, дейді тілшілер.
Кішкентай Арина биыл бірінші сыныпқа барды. Бірақ мектепке оны өзге балалар сияқты анасы емес, нағашы апасы жетектеп апарған. Беске жетер-жетпесте жетім қалған бүлдіршіннің анасы туралы естелігі жыл өткен сайын бұлыңғырланып барады.
Бүлдіршіндердің анасын 2015 жылы әкесі өлтірген. Жантүршігерлік қылмыстан кейін бас сауғалаған қылмыскер бірнеше айдан соң ағасының үйіндегі жертөледен табылған-ды. Сот үкімімен 18 жылға сотталған азаматтың түрмеге қамалғанына екі жылдан асты. Төрт баланың тәрбиесін марқұмның апасы өз мойнына алған. Алайда балалар әлі күнге дейін әкелерінен сот тағайындаған материалдық шығынды өндіре алмай жүр.
"Жеке сот орындаушылары жұмыс істегісі келмейді. Ештеңе өндіре алмаймыз деп қарап отыр. Онда сот неге болды, сот неге ондай үкім шығарды?", - дейді марқұм С.Сәдуованың апасы Айгүл Дәрменова.
Судьяның үкімі мен оның орындалуы екі бөлек дүние көрінеді. Сот залынан абақтыға аттанған Қанат Сәдуовттен екі жылда бірде-бір хабар жоқ. Тас бауыр әкеден бүгін оның балалары да бас тартып отыр.
"Байланыс болмайды да. Хабарласпаймын. 18 жыл бойы отырсын түрмеде, шықпай. Балалар Петропавлда, өзім Астанадамын қазір", - дейді үлкен ұлы Талғат Сәдуов.
Үйдің үлкені Талғаттың тапқаны қалған үш баланың қажетіне жетпейді. Балалардың оқуына бола шалғайдан Қызылжарға көшкен Айгүл, үйді 80 мыңға жалдап тұрады екен. Жетімдер мемлекеттен де ешбір көмек көрмейді. Есесіне, мемлекеттің есебінен ішіп-жеп, қамауда жатқан әкелері жұмыс істеуден бас тартыпты. Ал мәжбүрлеп жегуге заңның күші жоқ.
© КТК кадрлары
"Асырап алушы сот бұйрығын алуға өтініш беруі керек. Ол күшіне енген соң, бұйрықты сот орындаушысы арқылы түзету мекемесіне тікелей жібереді. Мекеменің арнайы бөлімшесі қарызды сотталушының табысынан ұстап отыруы керек. Әрине, егер де табыс болса", - дейді заңгер Олег Корчагин.
Бір сөзбен, заңның қылмыскердің құқығын қорғауға күші жеткенімен, жылап қалған жетімдерді жебеуге әмірі жүрмейді. Жұмыс істемек түгілі, жөн айтуға ерінетін сот орындаушыларына шара таппаған жетімдер, жанайқайы журналистер арқылы құзырлы органдарға жетеді ме деген үмітте (Дереккөз: КТК).
