+7 (777) 001 44 99
Қазақша
Русский
English
Мәжіліс депутаты Ринат Зайыт Болат Назарбаевтың үлкен ұлы Нұрбол Назарбаевтың мүлкіне тексеріс жүргізуді сұрады, - деп хабарлайды Tengrinews.kz тілшісі.
Депутаттың сөзінше, жуырда Болат Назарбаевтың ұлы Нұрбол Назарбаев сот шешімімен 57 миллиард теңге көлеміндегі активінен айырылып, бұл мүлік мемлекет меншігіне қайтарылған.
"Оған 925 миллион теңге айыппұл және 230,4 миллион теңге айыпақы салынды. Ең бастысы оның барлық банк шоты бұғатталып, компания кірісін және жеке мүлкін басқару құқығынан айырылды", - деді ол.
Ринат Зайыт мәселе мұнымен бітпейтінін айтты.
"Бұл әулеттің рейдерлік жолмен иеленген базарлары, сондай-ақ, Алматы қаласы мен облысында заңсыз алған жер телімдері туралы қоғамда түрлі дерек айтылып жүр. Әсіресе, атышулы "Алтын орда" базарына қатысы жиі сөз болады. Алайда бұл нысандардың тәркіленген активтер қатарында бар-жоғы әзірге белгісіз. Себебі бұл мәселелердің нақты жай-жапсары ашық түрде жарияланбаған. Сот шешімдері шыққанымен, процестер жабық түрде өтуі қоғамда алаңдаушылық туғызады. Өйткені активтердің қайтарылғаннан кейінгі тағдыры, олардың халыққа нақты пайдасы, жұмыс орындары сақталуы сияқты мәселелер түсініксіз қалып отыр", - деді депутат.
Мәжіліс депутаты Ринат Зайыт Бас прокурор Берік Асыловқа мынадай сауалдар жолдады:
- Нұрбол Назарбаевтың иелігіндегі компаниялар мен активтерге түгендеме жүргізіп, оның заңдылығын анықтау, заңсыздарын мемлекет меншігіне қайтару.
- Қайтарылған заңсыз активтер және олардың пайдаланылуы бойынша толық ақпаратты жұртшылыққа қолжетімді ету.
- "Алтын орда" базары және Алматы қаласы, Алматы облысындағы заңсыз иеленген жер телімдері бойынша тергеуді бастау.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
