+7 (777) 001 44 99
Қазақша
Русский
English
Қазақша
Русский
English
Мектеп түлектерінің денсаулығында ақау болуы мен жасөспірімдердің есірткіге әуестігі дене шынықтыру пәні мұғалімдерінің тым аз айлық алатынына байланысты. Бұл туралы мәжілісмен Берік Дүйсембинов мәлімдеді, - деп хабарлайды Tengrinews.kz тілшісі.
"Ресми статистикаға сай түлектердің 80 пайызының денсаулығында ақау бар, сонымен қатар, олардың арасында есірткі мен алкогольге әуестігі бар. Бұл мәселе жастардың бос уақытын дұрыс пайдаланбаудан шығады. Қазіргі уақытта жастардың 30 пайызы ғана спортпен шұғылданады екен. Дамыған елдерде бұл көрсеткіш - 70 пайыз. Зиянкес әдеттерден жастарды аулақ ұстау үшін спортқа тарту керек", - деді Дүйсембинов өзінің ресми сауалында елдің премьер-министріне.
Оның айтуынша, балалардың спортқа жақын болмауы дене шынықтыру пәні мұғалімінің аз айлық алуынан пайда болған. "Егер мұғалімнің жұмысын қаржылай бағалайтын болсақ, ол бір дене шынықтыру сабағы үшін 500 теңге алады. Бұл жағдайда дене шынықтыру пәні мұғалімі - бір үйдің асыраушысы әрі ер адам екенін ескеру қажет. Басқа ұйымдарды салыстыратын болсақ, оларда бір сағат жаттығу 5 мың теңге тұрады, сол себепті ата-аналар секцияларға балаларын жібермейді. Дене шынықтыру пәні мұғалімінің деңгейі мен статусын жоғарылату қажет. Әрине барлық бала олимпиада чемпионы бола қоймас, бірақ олар өздері үшін спортпен айналысатын болады", - деді депутат.
Дүйсембинов мұғалімдердің сабақтан тыс жаттығулар өткізгені үшін 7 мың теңге айлық алатынын айтты, алайда 2015 жылы бұл ереже алып тасталған.
Еске салайық, биыл ақпанда депутаттар орта мектептердегі мұғалімдердің жалақысын өсіруді сұраған. Білім министрі Ерлан Сағадиев осы жалақыны қалдырып, сабақтардың санын азайтуды ұсынған.
