11 сәуір 2023 | 17:11

Қарағанды облысында 14 жастағы спортшы ауыр жарақаттан қайтыс болды

Гүлнара Досымшалова Корреспондент

Қарағанды облысында 14 жастағы спортшы жансақтау бөлімінде қайтыс болды, - деп хабарлайды Tengrinews.kz тілшісі.

Жас спортшының қайтыс болғаны туралы қыз тұратын Осакаров ауданының әкімі Руслан Нұрмұханбетов Faceebook-те хабарлады.

"10 сәуірде жас спортшы Соннова Арина Васильевнаның жүрегі тоқтап қалды. Арина каратэ-киокушинкай-канмен айналысып, спорттың осы түрінен Қазақстан Республикасы ұлттық құрамасының мүшесі болған. Отбасына қайғырып көңіл айтамын", - деп жазды аудан әкімі.

Қыздың өлімі туралы ақпаратқа Қарағанды облысының дене шынықтыру және спорт басқармасының баспасөз қызметі түсініктеме берді. Ведомство қыздың ауыр жарақаттан қайтыс болғанын айтты.

Арина Соннова аттан құлап, тасқа соғылған. Кейін алған жарақаттарынан қайтыс болған. Ол 6 жасынан бастап Осакаровка ауылында каратэмен айналысқан. Жас спортшы республикалық және халықаралық деңгейдегі турнирлерде бірінші орын иеленген. Арина Қазақстан чемпионаты мен кубогының, сондай-ақ, Азия біріншілігінің жүлдегері болған.

Аринаның алғашқы жетістігі Жезқазған қаласында өткен балалар арасындағы ашық аймақтық турнирде бірінші орын алуы еді. Соннованың жеңістерінің ішінде маңыздысы - 2019 жылы Тараз қаласында өткен Азия кубогы. Онда спортшы 2-орын алған. Кубок қорытындысы бойынша Арина каратэ-киокушинкай-каннан Қазақстан құрамасына кірген.

"Арина Соннованың туыстары мен жақындарына көңіл айтамыз", - делінген Қарағанды облысының дене шынықтыру және спорт басқармасы хабарламасында.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Қарағанды спорт