+7 (777) 001 44 99
Қазақша
Русский
English
Үкіметтің бүгінгі шұғыл отырысында Премьер-министр Серік Ахметов отставкаға кеткенін мәлімдеді, - деп хабарлайды Tengrinews.kz тілшісі.
"Бүгін Мемлекет басшысы менің отставкаға кетуге берген өтінішімді қабылдады", - деді С.Ахметов. Заңнамаға сәйкес, Үкімет басшысы отставкаға кетсе, онымен бірге бүкіл Министрлер кабинеті де кетуі тиіс. Үкімет басшысы Президентке және өз командасына алғыс білдірді. "Бірге жұмыс істегендеріңізге алғыс айтып, барлығыңызға табыс тілеймін. Үкіметтің қазіргі құрамы қалып, Отанымыз - Қазақстан Республикасының игілігі үшін қызмет етеді деп сенемін", - деп атап көрсетті С.Ахметов.
ҚР Президенті баспасөз қызметінің хабарлауынша, Мемлекет басшысы бүгін Парламент Мәжілісі фракция жетекшілерінің қатысуымен жаңа премьер-министрдің кандидатурасы жөнінде кеңес өткізген.
Серік Ахметов 1958 жылдың 25 маусымында Қарағанды облысында дүниеге келген. 2001 жылы Теміртау қаласының әкімі, одан кейін Астана қаласы әкімінің бірінші орынбасары, ҚР Президенті Әкімшілігінің Ұйымдастыру-бақылау жұмысы және кадр саясаты басқармасы мемлекеттік инспекциясының меңгерушісі, "Атамекен" кәсіпкерлер мен жұмыс берушілер одағының басқарма төрағасы, ҚР Көлік және коммуникация министрі, ҚР Премьер-министрінің орынбасары қызметтерін атқарды. 2009 жылдың қарашасынан Қарағанды облысының әкімі, 2012 жылдың қаңтарынан бастап, ҚР Премьер-министрінің бірінші орынбасары болды. Үкімет басшысы қызметін 2012 жылдың 24 қыркүйегінен бері атқарды.
