Қазақстанда алдағы күндері ауа райы тұрақсыз болады

Дина Шарипханова Корреспондент

Фото:depositphotos.com

"Қазгидромет" 28, 29 және 30 тамызға арналған ауа райы болжамын ұсынды, - деп хабарлайды Tengrinews.kz тілшісі.

Циклон Қазақстанға тұрақсыз ауа райын әкеледі

Қазақстанның басым бөлігінде антициклон әсерінен жауын-шашынсыз ауа райы сақталады. Алайда 29 тамызда солтүстік-батыс циклонының өтуіне байланысты елдің солтүстік, орталық және шығыс өңірлерінде ауа райының тұрақсыз сипаты болжанады, ал 30 тамызда тұрақсыз ауа райы Қазақстанның оңтүстік-шығысын да қамтиды.

"Найзағай мен жауын-шашын күтіледі, 30 тамызда елдің солтүстігінде, шығысында және орталығында бұршақ аралас нөсер жаңбыр мен екпінді жел болжанады. Республика бойынша жел күшейеді, батыста, солтүстікте, солтүстік-батыста түнгі және таңғы сағаттарда тұман күтіледі", – деді "Қазгидромет" синоптиктері.

Ауа температурасы қандай болады?

Елдің батысында ауа температурасы +20…+31 градус, оңтүстік-батыста – +27…+35 градус шамасында болады. Сонымен қатар айтарлықтай салқындау күтіледі:

солтүстік-батыста – +23…+33 градустан +15…+23 градусқа дейін,
солтүстік өңірлерде – +30…+35 градустан +15…+23 градусқа дейін,
орталықта – +30…+37 градустан +18…+27 градусқа дейін,
шығыста – +22…+32 градустан +17…+28 градусқа дейін,
оңтүстікте – +30…+41 градустан +26…+35 градусқа дейін төмендейді.

Оңтүстік-шығыста аптап ыстық сақталады – +33…+38 градус, таулы аймақтарда – +23…+28 градус.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Ауа райы Болжам