+7 (777) 001 44 99
Қазақша
Русский
English
Бүгін Сенатта жаңа Салық кодексі жобасын талқылау барысында Қаржы және бюджет комитетінің мүшесі Бекболат Орынбеков арнайы салық режимдері (АСР) жүйесін реформалау жөніндегі бастамасын жария етті, - деп хабарлайды Tengrinews.kz тілшісі.
Ұсынысқа сәйкес, қазіргі қолданылып жүрген жеті режимнің орнына тек үш режим қалады. Оның біріншісі — өзін-өзі жұмыспен қамтыған азаматтарға арналған. Бұл режим жылдық табысы 15 миллион теңгеге дейін болған жағдайда 4 пайыздық мөлшерлеме бойынша салық төлеуді көздейді. Бұл ретте жеке кәсіпкер ретінде тіркелу талап етілмейді.
Екінші режим — жеңілдетілген декларация негізінде. Ол жылдық табысы 600 мың АЕК-ке дейінгі (2025 жылы 2,36 миллиард теңге) кәсіпкерлерге арналған. Негізгі 4 пайыздық мөлшерлемені сақтау ұсынылады, алайда жергілікті мәслихаттар оны 2-ден 6 пайызға дейінгі аралықта өзгерте алады. Сондай-ақ бұл режимде жұмысшылар санына шектеу қойылмайды.
Үшінші режим шаруа және фермер қожалықтарына қолданылады. Жалпы алғанда, ол қолданыстағы заңнамадағы нормаларды сақтап қалады. Алайда жаңартылған тәсіл аясында бірыңғай жер салығы жеке табыс салығымен алмастырылады.
Бекболат Орынбековтың айтуынша, бұл бастама салық жүйесін оңайлату, бизнеске түсетін әкімшілік жүктемені азайту және елдегі өзін-өзі жұмыспен қамту өсімін ынталандыру мақсатында қолға алынып отыр. Ұсынылған өзгерістер жаңа Салық кодексі аясында қаралып жатқан ауқымды салық реформасының бір бөлігі болған.
Еске салайық, бұған дейін премьер-министрдің орынбасары – ұлттық экономика министрі Серік Жұманғарин Салық кодексі жобасы аясында бизнеске қатысты жоспарланған өзгерістер туралы айтып өткен болатын.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
