Қазақстанда адам папилломасы вирусына (АПВ) қарсы екпе алуға рұқсат етілетін азаматтар тізімі кеңеюі мүмкін. Бұл туралы денсаулық сақтау министрі Ақмарал Әлназарова мәлімдеді, - деп хабарлайды Tengrinews.kz тілшісі.
Мәжіліс кулуарында министрден болашақта 18 жастағы қазақстандық қыздар АПВ-ға қарсы екпе ала ала ма деген сұрақ қойылды. Қазіргі уақытта жас шегі – 11 жас.
"Бүгінде бұл мәселе депутаттар арасында да, халық арасында да көтеріліп отыр – екпені тек қыздарға ғана емес, ұлдарға да егу туралы. Жас шектеуін кеңейту жөнінде ұсыныстар бар. Халықаралық тәжірибе бойынша бүгінде 9 жастан бастап екпе егіледі. Сіздің 18 жастан бастау туралы ұсынысыңыз да қазіргі уақытта қаралып жатыр. Менің ойымша, бұл өте қисынды және дұрыс", – деп жауап берді Ақмарал Әлназарова.
Сондай-ақ, министр АПВ-ға қарсы екпені алуды қалаған адамдар үшін ақылы түрде алу мүмкіндігі де қарастырылып жатқанын айтты.
"Ересек адамдар тарапынан да осындай сұраныстар бар. Республикалық бюджеттен былтыр және биыл нақты контингентке – 11 жастағы қыздарға – қаржы бөлінді. Сондықтан одан жоғары жасқа, жынысына қарамастан, қосымша қаражат немесе қосымша талдау қажет. Бұл мәселе жұмыс барысында", – деп түсіндірді Әлназарова.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
