+7 (777) 001 44 99
Қазақша
Русский
English
Қазақша
Русский
English
Қаржы вице-министрі Ержан Біржанов блогерлерге салынған салық туралы жаңа мәліметтерді айтты, - деп хабарлайды Tengrinews.kz тілшісі.
Біржановтың сөзінше, Қазақстанда 50-ден аса блогер салық төлеген.
"Бүгінде 50-ден аса блогер 2,5 миллиард теңге көлеміндегі кірісін көрсетті. Ол бойынша салық төленді", - деді Біржанов Мәжіліс дәлізінде.
Вице-министр нақты ақпаратты айдың соңына дейін хабарлауға уәде берді.
"Әлі уақыт бар. 30 жұмыс күні берілді. Наурыздың соңына дейін салыстырып, ақпарат береміз", - деді Біржанов.
Айта кетейік, жуырда премьер-министрдің орынбасары - ұлттық экономика министрі Серік Жұманғарин салық төлемегендер тізіміне енген қазақстандық блогерлер қарыздарын өтей бастағанын айтты.
Еске салайық, бұған дейін қазақстандық блогерлерге 53 млрд теңге төлеуге бір ай уақыт берілді. Мемлекеттік кірістер комитеті мәліметінше, 594 адам кірісін жалпы сомасы 53,3 миллиард теңгеге төмендеткен. Енді блогерлер нақтыланған салық есебін тапсырып, салық төлеуі керек немесе 30 жұмыс күні ішінде түсініктеме беруі қажет.
Бұған дейін Мемлекеттік кірістер комитеті Жеке тұлғалардың кірістерін әкімшілендіру басқармасының басшысы Дина Құсайынова салық органдарына қазақстандықтардан шағым түскенін мәлімдеді. Ол блогерлерге хабарламалар 2025 жылғы ақпанда 2022 және 2023 жылдардағы деректерді талдау нәтижесінде жіберілгенін айтты.
Мемлекеттік кірістер комитеті бұдан кейін де әлеуметтік желілерде тарап кеткен блогерлердің тізімі мен олардың табысы туралы ақпаратқа пікір білдіріп, бұл тізім ресми құжат емес екенін және жүргізіліп жатқан салық тексерісіне қатысы жоқ екенін айтты.
Артынша Мемлекеттік кірістер комитеті блогерлерге қатысты тағы бір мәлімдеме жасап, 19 ақпанда жалпы сомасы 9,8 млрд. теңгеге 93 блогерге жіберілген 169 хабарлама кері қайтарылғанын хабарлады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
