Алматы облысында сот жазатайым оқиғадан кейін жұмыс берушіні қызметкеріне 28 миллион теңгеге протез сатып алуға міндеттеді, - деп хабарлайды Tengrinews.kz.
Істің мән-жайы
Қазақстандық өндірісте ауыр жарақат алып, салдарынан қолынан айырылған. Медициналық-әлеуметтік сараптама қорытындысы бойынша еңбекке қабілеттілігінен тұрақты айырылуы және тұрақты протездеу қажеттілігі анықталды.
Сот жарақаттың еңбек міндеттерін орындау кезінде алынғанын анықтады. Сондай-ақ, талап қоюшының функцияларды қалпына келтіру және әлеуметтік бейімделу үшін жоғары технологиялық протезге мұқтаж екені расталды.
Сот шешімі
Іле аудандық соты ЖШС-ні шешім заңды күшіне енген күннен бастап бір ай ішінде өз қызметкері үшін бағасы 28 606 425 теңге болатын микропроцессормен басқарылатын көп ұстағышты қол протезін дайындауға және сатып алуға "Республикалық протездік-ортопедиялық орталық" АҚ-мен келісімшарт жасасуға, сондай-ақ ЖШС-ні протездеу кезеңінде медициналық стационарда тұру шығындарын қоса алғанда протез құнын төлеуге міндеттеді.
Шешім заңды күшіне енді.
