Қазақстандықтарға “ҚР Жол полициясы департаментінен“ келетін SMS туралы ескертілді

Қазақстандықтарға "ҚР Жол полициясы департаменті" деген тақырыппен төленбеген әкімшілік айыппұлдар туралы келетін күдікті SMS-хабарламалардың жиілеп кеткені ескертілді, деп хабарлайды Tengrinews.kz Қарағанды облысының ПД-не сілтеме жасап.

"Өңір тұрғындарына "ҚР Жол полициясы департаменті" атынан айыппұлдар туралы күдікті SMS-тер жиі келе бастады. Бұл - күмәнді сілтемелер арқылы ақшаңыз бен жеке деректеріңізді қолды етуді көздейтін алаяқтардың айласы", - делінген хабарламада.

Осыған байланысты полиция өңір тұрғындарын барынша сақ болуға және тек ресми ақпарат көздеріне сенуге шақырады. Әкімшілік айыппұлдардың бар-жоғын тек мемлекеттік сервистер арқылы тексеруге болады:

• qamqor.gov.kz
• eGov.kz
• сондай-ақ екінші деңгейлі банктердің мобильді қосымшаларынан.

Еске сала кетейік, бұған дейін ІІМ қазақстандықтар мен ата-аналарға мессенджерлер мен әлеуметтік желілердегі аккаунттардың алаяқтық схемаларға пайдаланылу жағдайлары туралы ескерту жасады. Ведомство мәліметінше, жасөспірімдер сыйақы үшін сим-карталар мен аккаунттар тіркейді, кейін оларды қаскөйлер азаматтарды алдау үшін пайдаланады.