+7 (777) 001 44 99
Қазақша
Русский
English
ҚР Жоғарғы соты республика бойынша сот органдарының 2014 жылғы жұмысын сегіз өлшем бойынша бағалап, үздік өңірлік соттардың рейтингін жасады, - деп хабарлайды Тengrinews.kz тілшісі ведомствоның баспасөз қызметіне сілтеме жасап.
Сот органдарының қызметі мынадай негізгі өлшемдер бойынша бағаланды: аудандық және соған теңестірілген соттардың және облыстық алқалар мен соған тең соттардың сот төрелігіне жіберу сапасы; өңірде бірыңғай үлгідегі сот тәжірибесін қалыптастыру; сот этикасы нормаларын сақтау мен атқару және еңбек тәртібінің жағдайы; қоғаммен және бұқаралық ақпарат құралдарымен өзара байланысу деңгейі; облыстық сот пен апелляциялық сот алқасы төрағасының істі қарау жөніндегі жұмысының тығыздығы; істі автоматтандырылған түрде қарау ережелерін сақтау; соттарда қазіргі заманғы ақпараттық технологияларды қолдану және соттардың кәсіби деңгейін арттыру.
Бағалау нәтижесі бойынша Шығыс Қазақстан облысының соттары алдыңғы жылғыдай көш басына шықты. Екінші орында - Солтүстік Қазақстан облысының, үшінші орында - Жамбыл облысының сот органдары. "Алматы мен Астана қаласының сот органдары және Әскери сот жекелеген позициялар бойынша көрсеткіштерін жақсартқанымен, тұтас алғанда, рейтингтің соңғы орындарынан көрінді", - делінген хабарламада.
Жоғарғы сот өкілдерінің мәліметінше, сот органдары жұмысын бағалаудың бұл әдістемесін ҚР Жоғарғы сотының өзі халықаралық тәжірибені ескере отырып жасаған. Қазіргі уақытта Еуропа мен Азия-Тынық мұхиты елдерінің көбі соттар жұмысын бағалаудың тиімді әдістемесін іздестіріп жатыр.
