Қазгидромет Алматы мен Атырау тұрғындарына ескерту жасады

Ақпарат бейсенбіге арналған ауа сапасы болжамына қатысты.

"16 шілдеде Алматыда, түнде Атырауда қолайсыз метеорологиялық жағдай күтіледі.", - делінген хабарламада.

Ауаның ластануы түріндегі қолайсыз метеожағдай - бұл атмосфераның жерге жақын қабатында зиянды (ластаушы) заттардың жиналуына ықпал ететін қысқа мерзімді метеорологиялық факторлар (тымыш, әлсіз жел, тұман, инверсия) жиынтығы.

Синоптиктер болжамы бойынша, Алматыда күн райы құбылмалы болады, жауын-шашын күтілмейді. Жел оңтүстік-шығыстан соғып, оңтүстік-батысқа ауысады, жылдамдығы секундына 3-8 метрге жетеді. Ауа температурасы түнде 22-24 градус жылы, күндіз 36-38 градусқа дейін аптап ыстық болады.

Атырауда күн райы құбылмалы болады, күндіз аздап жаңбыр жауып, найзағай ойнайды. Жел солтүстік-батыстан соғып, оңтүстік-батысқа ауысады, жылдамдығы түнде секундына 2-7, күндіз 9-14 метрге жетеді. Ауа температурасы түнде 23-25 градус жылы, күндіз 33-35 градусқа дейін аптап ыстық болады.

Бұған дейін синоптиктер Астана, Алматы және Шымкентте алдағы үш күнде – 16, 17 және 18 шілдеде ауа райы қандай болатынын айтқан еді, толығырақ мына материалда.

Тағы оқыңыз: Астана мен Алматыда аптап салдарынан жедел жәрдем шақырушылар саны артқан