14 наурыз 2020 | 14:56

Коронавирус анықталған жолаушымен Нұр-Сұлтанға ұшып келген 53 адам оқшауланды

©REUTERS

Коронавирус жұқтырған қазақстандықпен Нұр-Сұлтанға 89 адам ұшып келген, - деп хабарлайды Tengrinews.kz тілшісі.

"12 наурыздағы Мәскеу - Нұр-Сұлтан рейсіндегі жолаушылар туралы ақпарат. 13 наурызда Нұр-Сұлтанда коронавирустың алғашқы жағдайы тіркелді. Ол Милан арқылы Мәскеу - Нұр-Сұлтан рейсімен ұшып келген.

Бортта барлығы 89 адам болған. Оның ішінде 42 қазақстандық бар. Басқа елдерден 47 адам болған. Ресей - 42, Нидерланды - 1, Аустралия - 1, АҚШ - 1, Украина - 1, Мексика -1. Барлық 89 жолаушы табылды. Нұр-Сұлтан қаласынан 35 жолаушы шықты, олардың ішінде 14 адам Қазақстанның басқа аймақтарына кетті, жолаушылар аймақтық денсаулық сақтау басқармаларына берілді. 14 азамат провизорлық станцияларға жатқызылды - бұл Алматы, Атырау, Степногорск, Қарағандыда", - деді Нұр-Сұлтан Денсаулық сақтау басқармасының басшысы Сәуле Қисықова брифингте.

Оның айтуынша, бүгін таңертең сағат 08.00-де аталған аймақтарда осы адамдарды табу үшін тексеру жұмыстары жүргізілді.

"Сондай-ақ, 21 жолаушы Ресейге ұшып кетті. Нұр-Сұлтан қаласы бойынша - 54 жолаушы бар. Оның 53-і елордалық стационарға жатқызылды. Ресейдің бір азаматы дипломатиялық дәрежесінің болуына және Ресей елшілігі нотасының берілуіне байланысты елшілік аумағында қалды. Барлық ауруханаға жатқызылған 53 жолаушыға зерттеу жұмыстары жүргізілді. Қосымша ақпарат беріледі", - деді ол.

Қазақстан жаңалықтары. Соңғы жаңалықтар. Telegram желісінде бізге жазыл!

Нұр-Сұлтан коронавирус