12 қараша 2023 | 11:26

Қуандық Бишімбаев екі айға қамауға алынды

Фото ©️ Tengrinews.kz / Тұрар Қазанғапов

Экс-министр Қуандық Бишімбаев екі айға қамауға алынды, - деп хабарлайды Tengrinews.kz тілшісі.

Елордалық соттың баспасөз қызметі күдіктінің екі ай мерзімге қамауға алынғанын хабарлады.

"2023 жылғы 11 қарашада Астана қаласының мамандандырылған ауданаралық тергеу соты күдікті Бишімбаев Қ-ға қатысты 2 ай мерзімге қамауға алу түріндегі бұлтартпау шарасын санкциялады", - делінген Астана сотының хабарламасында.

Басқа деректер ҚР Қылмыстық-процестік кодексінің 201-бабына сәйкес жарияланбайды.

Еске салайық, 9 қарашада экс-министр Қуандық Бишімбаевтың ұсталғаны белгілі болды. Астанадағы мейрамханалардың бірінде келушілер арасында жанжал шығып, салдарынан бір әйел алған жарақатынан көз жұмған. Болжам бойынша, әңгіме экс-министрдің әйелі туралы. Бишімбаевтың ұсталғаны туралы хабарламамен қатар Астана полициясы ер адамның ұсталғаны туралы пікір білдірді. Бірақ оның аты-жөнін нақтыламады.

Сондай-ақ, сағат 19:54-те астаналық жедел медициналық қызмет көрсету станциясы пультіне қоңырау түскен. Жедел жәрдем бригадасы жеткенде 1992 жылы туған әйелдің қаза болғаны расталды. Кейін марқұмның 31 жастағы Салтанат Нүкенова екені белгілі болды. Ол - Қуандық Бишімбаевтың әйелі.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Қамау Сот төрелігі