Құрылтай сайлауына бес елден бақылаушылар аккредиттелді

ОСК төрағасының орынбасары Мұхтар Ерманның мәліметінше, 23 шілдеде Орталық сайлау комиссиясына бес шет мемлекет пен бір халықаралық ұйымнан тағы 10 бақылаушыны аккредиттеуге құжаттар түскен.

Олардың қатарында Молдованың төрт өкілі (соның ішінде осы елдің ОСК төрағасы), Халықаралық парламентшілер конгресінің (IPC) бір өкілі, Албаниядан екі бақылаушы, Кувейттің Қазақстандағы елшісі, сондай-ақ Армения мен Палестинадан бір-бір өкілден бар.

ОСК деректері

Бүгінде 96 халықаралық бақылаушы аккредиттеуден өтті. Бұған дейін кімдердің аккредиттелгені туралы толығырақ мына сілтемеде.

1 шілдеде Қазақстанда жаңа Конституция күшіне енді. Сонымен қатар Мәжіліс пен Сенат жұмысын тоқтатып, депутаттардың өкілеттігі аяқталды. Жаңа Конституцияға сәйкес, елде екі палаталы Парламенттің орнына бір палаталы орган – Құрылтай жұмыс істейді.

Жаңа заң шығарушы орган депутаттарының сайлауы 23 тамызға белгіленді. Тиісті жарлыққа Президент Қасым-Жомарт Тоқаев қол қойды. Сайлауға 7 саяси партия қатысады.