Ауыл шаруашылығы министрі Ербол Қарашөкеев Қазақстанда отандық қант өндірісіне қатысты мәселелерді шешу қалай жоспарланып отырғанын айтты, - деп хабарлайды Tengrinews.kz тілшісі.
"Қанттың жылдық тұтынуы шамамен 532 мың тонна, оның 7 пайызы отандық шикізаттан. Бұған шағын өндіріс, суаруға қажетті судың тапшылығы және қант қызылшасын өсірудегі қол еңбегі, қант зауыттарының құнсыздануы, ресейлік өндірушілердің бағаға қатысты демпингі себеп болып отыр", - деді Қарашөкеев Үкімет отырысында.
Ол сумен қамтамасыз ету, егіс алқаптарын 14,5 мың гектардан 38 мың гектарға дейін кеңейту, техникалық жарақтандыру, сондай-ақ саланы инфрақұрылымдық дамыта отырып, қант зауытын жаңғырту және салу жөніндегі жобаларды іске қосу есебінен жалпы өнім жинауды 332 мыңнан 1,8 миллион тоннаға дейін ұлғайту күтіліп отырғанын айтты.
"Қант өндірісін 7 есеге 254 мың тоннаға дейін ұлғайту, қант импортын 32 пайызға төмендету күтіледі, бұл ішкі нарықтың отандық өндірістегі қантпен қамтамасыз етілуін 7-ден 43 пайызға дейін арттыруға мүмкіндік береді", - деді министр.
Оның айтуынша, мұндай нәтижелерге қолжеткізу үшін 5-6 жылға субсидиялар мен жеңілдетілген несиелер беру арқылы мемлекеттік қолдау қажет.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
