+7 (777) 001 44 99
Қазақша
Русский
English
Қазақстандықтар WhatsApp мессенджерінде жаңа жылдан бастап педагогтердің еңбекақысы қысқаратыны туралы ақпарат таратқан. Хабарламада 30 пайыз көлеміндегі жаңартылған бағдарлама бойынша сабақ бергені үшін қосымша төлемдер алып тасталатыны айтылған, - деп хабарлайды Tengrinews.kz тілшісі StopFake.kz сайтына сілтеме жасап.
"Жаңа жылдан бастап мұғалімдердің еңбекақысы 25 пайызға көтеріледі. Бірақ олар жаңарту үшін сыйақыны алып тастайды, яғни 30 пайызға азаяды", - дейді хабарлама авторы.
Ведомство өкілдері жаңартылған білім беру мазмұны үшін қосымша ақы бұрынғыдай төленетінін атап өтті.
"Жаңартылған білім беру мазмұны үшін қосымша ақы бұрынғыдай төленеді. Сонымен қатар, келесі жылдың қаңтар айынан бастап Мемлекет басшысы Қасым-Жомарт Тоқаевтың тапсырмасы бойынша педагогтердің еңбекақысы тағы 25 пайызға көтерілетінін еске саламыз. Айта кетейік, 2020 жылы педагогтердің еңбекақысы - 25 пайызға, 2021 жылы тағы 25 пайызға өсті. Бұдан бөлек, Президент қолдауының арқасында, білік санаты үшін қосымша ақы 30-50 пайызға дейін ұлғайтылды", - деп хабарлады ведомствоның баспасөз хатшысы Мөлдір Әбдуалиева.
Сондай-ақ, ол мұғалімдерге дәптерлерді тексеру және сынып жетекшілігі үшін үстемеақының екі есеге артқанын, тәлімгерлік үшін қосымша ақы төлеу сынды жаңа санат пайда болғанын атап өтті. Министрлік қазақстандықтарды тек ресми ақпаратқа ғана сенуге және желіде тараған қауесеттерге назар аудармауға шақырды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
