Мыңдаған тұтқын бостандыққа шығады: Мәжіліс рақымшылық туралы заңды қабылдады

Дина Шарипханова Корреспондент

Фото ©️ Турар Казангапов

Мәжіліс депутаттары "Қазақстан Республикасы Конституциясының отыз жылдығына байланысты амнистия туралы" заңды қабылдады, - деп хабарлайды Tengrinews.kz тілшісі.

Мәжіліс депутаттары "Қазақстан Республикасы Конституциясының отыз жылдығына байланысты амнистия туралы" заңды қабылдады, - деп хабарлайды Tengrinews.kz тілшісі.

Құжат 2025 жылғы сәуірде Мемлекет басшысы жариялаған тапсырмаға сәйкес әзірленген.

Не ұсынылады?

Қылмыстық теріс қылық немесе онша ауыр емес қылмыс жасағандарды жазадан босату;
Орташа ауыр қылмыстар бойынша, егер залал келтірілмесе немесе толық өтелсе, жазадан босату;
Орташа ауыр қылмыстар бойынша, егер әлеуметтік осал санаттағы азаматтар туралы сөз болса — залалға қарамастан, жазадан босату.

Сонымен қатар, заң күшіне енгенге дейін жасалған ауыр емес және орташа ауырлықтағы қылмыстар бойынша қозғалған істерді, егер сот шешімі әлі шықпаған болса да, тоқтату ұсынылады.

Ауыр және аса ауыр қылмыстар үшін сотталғандар үшін жаза мерзімін қысқарту қарастырылған.

Алаяқтық немесе ірі сомаларды иемдену бойынша сотталғандар үшін, егер келтірілген залал толық өтелсе, жаза мерзімі бестен бір бөлікке қысқартылады.

Кімдерге амнистия қолданылмайды:

аса қауіпті қылмыс жасағандарға;
сыбайлас жемқорлық қылмыстары үшін сотталғандарға;
зорлық-зомбылық, денсаулыққа зиян келтіру, мемлекеттік құпияны жария ету сияқты қылмыстарға кінәлілерге.

Заң жобасын әзірлеушілердің бағалауынша, бұл құжат сотталғандар санын азайтуға мүмкіндік береді, бюджеттен қосымша шығынды қажет етпейді және теріс салдарға әкелмейді.

Мәжілістегі барлық салалық комитеттер заңды қолдады. Талқылаулар ІІМ, Бас прокуратура, Әділет министрлігі, судьялар, әскери қызметкерлер, ҮЕҰ және басқа да мемлекеттік органдардың қатысуымен өтті.

Қанша адам босатылады?

Мәжіліс депутаты Абзал Құспанның айтуынша, амнистияға 6 мың түзеу мекемесінде отырған сотталған және пробация қызметінің есебінде тұрған 9 мың адам ілігіп отыр.

"Жалпы 15 мың адам қамтылады. Қылмыстық-атқару жүйесі мекемелерінен шамамен 632 адам, пробация қызметінің есебінде тұрған 3,5 мың сотталған, яғни барлығы 4,1 мың адам бостандыққа шығады. Қалған 11 мың адамға жаза мерзімін дифференциалды қысқарту шарасы қолданылады. Заң жобасы 833 әйелге де қатысты болады: олардың ішінде 109-ы босатылады, 724-іне жаза мерзімі қысқартылады", — деді Құспан Мәжілістің жалпы отырысында.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

рақымшылық Түрме