+7 (777) 001 44 99
Қазақша
Русский
English
Қазақша
Русский
English
ПОДЕЛИТЬСЯ
Елбасы елорданың "жасыл белдеуін" тікұшақпен аралап, қала айналасындағы орманды алқаптың даму барысымен танысты, жылдағы дәстүр бойынша табиғи ортаға қырғауыл ұшыру шарасына қатысты, - деп хабарлайды Tengrinews.kz тілшісі Елбасы сайтына сілтеме жасап.
Елбасы елорданың "жасыл белдеуін" тікұшақпен аралап, қала айналасындағы орманды алқаптың даму барысымен танысты, жылдағы дәстүр бойынша табиғи ортаға қырғауыл ұшыру шарасына қатысты, - деп хабарлайды Tengrinews.kz тілшісі Елбасы сайтына сілтеме жасап.
Қазақстанның Тұңғыш Президенті "жасыл белдеу" осы жылдары жайлы климат қалыптастыруға және қала экологиясын жақсартуға айтарлықтай әсер еткенін атап өтті.
"Алғаш егілген ағаштар қазір 20 метрге жетіп, қалың орманға айналды. Өсімдіктер мен жануарлар дүниесі байып жатыр. Осы орманның арқасында жайлы климат қалыптасып, экология жақсарып келеді. Мен "жасыл белдеуді" дамытуға атсалысып жүрген адамдарға ризашылығымды білдіремін. Олардың еңбегі жоғары марапатқа лайық", - деді Нұрсұлтан Назарбаев.
Елбасы елорданы көгалдандыру жұмысына Түркия, Қытай, Венгрия және басқа да елдерден ғалымдар мен мамандар шақырылғанын айтты. Сондай-ақ қала ішіндегі саябақ аймақтарын дамыту жұмысына да тоқталды.
"Осы жылдары атқарылған шаруа жұртшылық тарапынан кеңінен қолдау тапты. Мұнда велосипед жолдары салынды, бос уақытта демалуға қажет дүниенің бәрі бар. Тұрғындар жидек пен саңырауқұлақ тереді", - деді Қазақстанның Тұңғыш Президенті.
Елбасы елорданың "жасыл белдеуіне" ұлттық саябақ мәртебесін беруді, өкілетті органдарға қала маңындағы жерлерге тексеріс жүргізуді ұсынды. Нұрсұлтан Назарбаев елорданы дамыту барысын қайта қарап, шаһар аумағындағы бос жатқан жерлерде ішінара құрылыс жүргізуге көшу қажеттігін айтты.
Сондай-ақ Қазақстанның Тұңғыш Президенті қоршаған ортаны аялаудың және баршаға ортақ байлықты келешек ұрпақ үшін сақтаудың маңызды екенін атап өтті.
"Табиғатты аялап, тазалық сақтау қажет. Ағаштарды өрттен қорғап, жойылып кетуіне жол бермеу керек. Мұның бәрі өзіміздің балаларымыз үшін, келер ұрпақтың игілігі үшін жасалып жатыр. Олар осындай керемет сый қалдырғанымыз үшін бізді мақтан тұтатын болады. Туған жерге деген махаббат - қазақстандық патриотизмнің маңызды бөлігі. Осы орайда Президент Қасым-Жомарт Тоқаевтың 2025 жылға дейін Қазақстанда екі миллиард ағаш отырғызу туралы бастамасын қолдаймын. Бұл маңызды әрі жауапты іс. Сол арқылы біз елімізді көгалдандырамыз. Жасыл желек экологияны жақсартады және халықтың денсаулығын нығайтуға қолайлы жағдай туғызады", - деді Елбасы.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
