+7 (777) 001 44 99
Қазақша
Русский
English
Бүгін Астанада Индустрияландыру күні аясындағы телекөпір кезінде Елбасы Нұрсұлтан Назарбаев Батыс Қазақстан облысындағы бекіре балығы мен оның уылдырығын өндіретін кешеннің жұмысымен танысып, сәттілік тіледі, - деп хабарлайды Baq.kz тілшісі.
Батыс Қазақстан облысынан тікелей эфирге шыққан "Аквамәдениеттер тәжірибелік-өнеркәсіптік өндірісі оқу-ғылыми кешені" ЖШС акционері Қайрат Мәмиев бұл кешенде бекіре уылдырығы жаңа тәсілмен алынып, өңделетінін айтты.
"Құрметті, Нұрсұлтан Әбішұлы! Біз осы кешенде бекіре балығы мен оның қара уылдырығын өндіреміз. Жаңа заман талаптарына лайықталып салынған. Балық шабағының өсуіне ерекше жағдай жасалған. Бекіре уылдырығы жаңа тәсілмен алынып, өңделеді", - деді Қайрат Мамиев.
Оның айтуынша, өнім халықаралық дәрежеде сертификат алған. Қазіргі кезде экспортқа шығарылады. Ал президент бұл өндіріс керек екенін айтып, жұмыстарына сәттілік тіледі.
Айта кетейік, Индустрияландыру бағдарламасын жүзеге асыру жылдарында 4 триллион теңгенің 961 жобасы іске қосылды. 90,6 мың тұрақты жұмыс орны ашылды. Индустрияландыру бағдарламасын жүзеге асыру басталғаннан бері 7,5 трлн теңге шамасында өнім алынды, соның ішінде биылғы жылдың 10 айында 1,8 трлн теңгенің өнімі өндірілді.
