Отан қорғаушылар күнінде Алматыда өтетін шаралар

2015 жылдың 7 мамырында Алматыда Отан қорғаушылар күні мерекеленеді, - деп хабарлайды Tengrinews.kz тілшісі қала әкімінің баспасөз қызметіне сілтеме жасап.

2015 жылдың 7 мамырында Алматыда Отан қорғаушылар күні мерекеленеді, - деп хабарлайды Tengrinews.kz тілшісі қала әкімінің баспасөз қызметіне сілтеме жасап.

Биыл Алматыда Астана қаласының "Қазақ елі" алаңында өтетін Әскери шеруден видеотрансляция көрсетіледі. Бағдарламада әскери техника, әскери киімдер мен қару-жарақ, әскерге шақырушылардың "Мәңгілік алауға" гүл шоқтарын қоюы, отандық эстрада жұлдыздарының мерекелік концерті бар. Шара сағат 10.00-де 28-ші гвардияшыл-панфиловшылар саябағында басталады.

Сонымен қатар, 7 мамырда Алматыда Отан қорғаушылар күніне арналған велошеру өтеді. Ұзындығы 9 шақырым болатын веложарыс Желтоқсан көшесінен әл-Фараби даңғылына дейін барып, Тұңғыш Президент саябағында мәреге жетеді.

"Жарысқа қатысушылар Сәтпаев пен Желтоқсан көшелерінің қиылысындағы Республика алаңында сағат 07.45-те жиналулары тиіс, велошеру сағат 08.15-те басталады. Шараның өтуіне байланысты Республика алаңынан (Сәтпаев пен Желтоқсан көшелерінің қиылысы) Тұңғыш Президент саябағына ( әл-Фараби даңғылы мен Мұстафин көшесі) дейінгі аралықтағы көлік қозғалысының бір бөлігі шектеледі. Сондықтан қалалықтарды жүретін бағыттарын алдын-ала анықтап алуды өтінеміз", - делінген хабарламада.

Айта кетейік, Алматы 1941-1945 жылдардағы Ұлы Отан соғысының Жеңіс күнінің 70 жылдығын да кең көлемде атап өтеді. 28-ші гвардияшыл-панфиловшылар паркінде 9 мамырда сағат 9.40-та "Мәңгілік алауға" гүл шоқтары қойылады. Концерттік сахна мен әскери асхана Свято-Вознесенск соборының жанына орналасады. Кешкі мерекелік концерт сағат 20.00-де "Астана" алаңында өтеді. Мерекелік отшашулар бір мезгілде сағат 22.00-де екі жерден "Астана" мен "Сайран" өзені маңынан беріледі.

Мереке Алматы