Өзбекстан президенті Нұрсұлтан Назарбаевқа қоңырау соқты, - деп хабарлайды Tengrinews.kz тілшісі Ақордаға сілтеме жасап.
Әңгіме барысында Шавкат Мирзиёев Нұрсұлтан Назарбаевты Қазақстан Республикасы Тәуелсіздігінің 25 жылдығымен құттықтап, халқымыздың одан әрі өсіп-өркендеуіне тілектестік білдірді.
Нұрсұлтан Назарбаев Шавкат Мирзиёевті Өзбекстан Республикасының Президенті лауазымына ресми түрде кірісуімен құттықтады.
Сондай-ақ, екі ел көшбасшылары екіжақты қарым-қатынастың қазіргі жағдайы мен перспективаларын талқылап, Қазақстан мен Өзбекстан ынтымақтастығын жандандырудың маңыздылығын атап өтті.
Телефон арқылы сөйлесуге Өзбекстан жағы бастамашы болды.
Сондай-ақ, бүгін Мемлекет басшысы Сербия Республикасының президенті Томислав Николичпен телефон арқылы сөйлесті. Сербия президенті де Нұрсұлтан Назарбаевты Қазақстан Тәуелсіздігінің 25 жылдығымен құттықтады.
