+7 (777) 001 44 99
Қазақша
Русский
English
ҚМА Батыс Қазақстан облысы бойынша департаменті несиелік серіктестік басшысына қатысты 150,7 миллион теңге көлеміндегі субсидияны жымқыру дерегі бойынша тергеуді аяқтады, - деп хабарлайды Tengrinews.kz тілшісі.
ҚМА мәліметінше, күдікті "Агробизнес" несиелеу бағдарламасы аясында бақылауындағы шаруа қожалығының атына заңсыз түрде 126,7 миллион теңге көлемінде жеңілдетілген несие рәсімдеген.
"Кейін бұл қаражат ірі қара мал сатып алынбастан, шаруа қожалығының шотынан қолма-қол ақшаға айналдырылған. Сонымен қатар, мал шаруашылығының ақпараттық жүйесі базасына жалған ақпарат енгізу арқылы ол 2017–2021 жылдарға арналған агроөнеркәсіптік кешенді дамыту жөніндегі ұлттық жоба шеңберінде бөлінген 24 миллион теңге көлеміндегі субсидияны заңсыз алған.
Субсидияны заңды түрде алынды деп көрсету мақсатында ол басқа шаруа қожалықтарынан асыл тұқымды сиыр сатып алды деген жалған құжаттарды тапсырған", - делінген хабарламада.
Қылмыстық жолмен алынған табысқа күдікті жер телімдерін сатып алып, олардың бірінде сауна мен сауда үйін салған. Аталған мүлікті жасыру мақсатында оны туысының атына рәсімдеген.
"Сот санкциясымен жалпы құны 198 миллион теңге болатын мүлікке — 2 жер теліміне, сауда үйіне, саунаға және "Exeed LX" маркалы автокөлікке — тыйым салынды", - делінген хабарламада.
Күдіктіге қатысты бұлтартпау шарасы ретінде қамауға алу қолданылды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
