"Талаптар өте қатаң": премьер-министр жаңа Салық кодексіне қатысты

Фото:depositphotos.com

Премьер-министр Олжас Бектенов жаңа Салық кодексін әзірлеу туралы айтты, - деп хабарлайды Tengrinews.kz тілшісі.

Үкімет басшысының айтуынша, жаңа кодекс ашық, түсінікті болуы керек.

"Жаңа Салық кодексі әзірленіп жатыр. Оған қойылатын талаптар өте қатаң. Бұрын ұсынылған тәсілдер орынды сынға ұшырады. Қоғам мен бизнес бұл құжаттан үлкен үміт күтеді. Ең бастысы, ол ашық, түсінуге оңай және теңгерімді болуы керек", - деді Бектенов Үкімет отырысында сөйлеген сөзінде.

Сонымен қатар, премьер-министр кодексті әзірлеу созылып кеткенін айтты.

"Осыған байланысты бұл жұмысты тез арада аяқтау қажет, 2023 жылдың аяғында салық және кедендік әкімшілендіру мәселелері бойынша тұрғындардан түскен өтініштер мен шағымдардың саны 226 мыңға жуықтады", - деді ол.

Негізінен мемлекеттік кірістер органдарының әрекеттері мен әрекетсіздігіне, қосылған құн салығын (ҚҚС) қайтаруды кешіктіру және мәмілелерді жарамсыз деп тануға шағымдар түседі.

"Жаңа кодексте осы жайттарды ескеріп, басымды әкімшіліктің сервистік моделіне аудару қажет екені анық. Жылдан жылға ҚҚС қайтару рәсімін жеңілдету мәселесі шешілмей келеді. Тиімсіз салық жеңілдіктерін оңтайландыру қажет", - деп түйіндеді сөзін премьер-министр.

Сілтемесіз жаңалық оқисыз ба? Онда Telegram желісінде парақшамызға тіркеліңіз!

Салық Заң