+7 (777) 001 44 99
Қазақша
Русский
English
Қазақша
Русский
English
Мемлекет басшысы Шығыс Қазақстан облысының әкімін қабылдады, - деп хабарлайды Tengrinews.kz тілшісі Ақорда сайтына сілтеме жасап.
Қасым-Жомарт Тоқаев Даниал Ахметовтің аймақтың әлеуметтік-экономикалық жағдайы туралы есебін тыңдады.
Облыс әкімінің айтуынша, физикалық өсім индексі 5 пайызға жетсе, негізгі капиталға салынған инвестиция 5 пайыздан асқан. Ауыл шаруашылығы мен құрылыс салаларында да едәуір өсім байқалады.
Кездесуде экономиканы одан әрі дамыту перспективалары талқыланды. Өндіріс қарқынын екі есе арттыруға мүмкіндік беретін "Ақтоғай" металлургия кешенінің екінші кезегін аяқтау мәселесі сөз болды.
Сонымен қатар, Президентке өңірдегі білім беру нысандарын дәстүрлі форматқа көшіруге дайындық жұмыстары туралы ақпарат берілді. Білім беру саласының қызметкерлері түгелдей дерлік вакцина салдырған.
Жалпы, облыста күніне 10 мың адамға вакцина салынады. Негізгі контингентке қыркүйектің соңына дейін вакцинаның бірінші компоненті, ал қазанның соңына дейін екінші компоненті салынады. Жалпы 747 мың адамға екпе салу жоспарланған.
Даниал Ахметов Мемлекет басшысын бұқаралық спортты дамыту жөнінде берген тапсырмаларының орындалу барысы туралы да хабардар етті. Мектептегі спортты дамытуға қосымша 890 миллион теңге бөлінген. Бүгінде мектеп оқушыларының 50 пайыздан астамының спортпен шұғылдануға мүмкіндігі бар. Биыл тағы 15 ірі спорт нысанының құрылысын аяқтау жоспарланған.
Қасым-Жомарт Тоқаев мемлекеттік әлеуметтік міндеттемелерді орындау маңызды екенін атап өтіп, өңірдегі көпбалалы және аз қамтылған отбасыларға үздіксіз көмек көрсетуді тапсырды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
