+7 (777) 001 44 99
Қазақша
Русский
English
Қазақша
Русский
English
Президент Қасым-Жомарт Тоқаев алдағы уақытта сайлауалды тұғырнамасын ұсынатынын айтты, - деп хабарлайды Tengrinews.kz тілшісі.
"Жақын арада мен сайлауалды тұғырнаманы ұсынамын, онда елді жан-жақты трансформациялау, азаматтардың әл-ауқатын арттыру жөніндегі шаралар болады. Менің сенімім бойынша, біздің мемлекет өңірлік және жаһандық қауіпсіздікті қамтамасыз етуге бағытталған теңдестірілген, көп бағытты, сындарлы сыртқы саясатты жүзеге асыруы тиіс", - деді Тоқаев Астанадағы форумда.
Президент Қазақстан халықаралық қатынастардағы теңдік пен демократия қағидаттарын, халықаралық құқық пен БҰҰ жарғысын ұдайы сақтауды үнемі қолдайтынын айтты.
"Қазақстан БҰҰ-ның әмбебап және баламасыз халықаралық ұйым ретіндегі беделін нығайту үшін белсенді күш-жігер жұмсайды. Біз Тәуелсіз мемлекеттер достастығы, Шанхай ынтымақтастық ұйымы, Еуропадағы қауіпсіздік және ынтымақтастық ұйымы, Түркі мемлекеттері ұйымы және басқа да халықаралық ұйымдармен ынтымақтасамыз, сондай-ақ Азиядағы өзара іс-қимыл және сенім шаралары жөніндегі кеңестің әлеуетін нығайтамыз", - деді Мемлекет басшысы.
Қасым-Жомарт Тоқаев мұндай сыртқы саясат Қазақстанның стратегиялық мүддесіне сай келетініне сенімді.
"Ұлттық тарихтың осы бетбұрыс кезеңінде Қазақстан халқы маған алдағы сайлау барысында сенім білдіреді деп сенемін. Сайлау - бұл қарапайым іс-шара емес, азаматтардың Отан тағдырына қатыстылығын растайтын патриотизм мен демократияның шынайы актісі. Біздің күшіміз бірлік пен бірігуде, ынтымақтастықта. Біз әртүрліміз, бірақ біз болашаққа ұмтылған біртұтас ұлтпыз", - деді Президент.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
