+7 (777) 001 44 99
Қазақша
Русский
English
Қазақша
Русский
English
Өзбекстанда Парламентаралық Одақ Ассамблеясының мерейтойлық отырысы өтті. Форумға әлемнің 140-тан астам елінен депутаттар әлеуметтік әділеттілік пен әлеуметтік дамуды қамтамасыз етудегі парламенттердің рөлін талқылауға жинады. Қазақстан Парламентінің делегациясын Мәжіліс төрағасы Ерлан Қошанов бастап барды.
Мәжіліс спикері атап өткендей, форумның ғасырлар бойы халықтар мен мәдениеттерді тоғыстырған Ұлы Жібек жолының бойында ұйымдастырылуының символдық мәні зор. Ол жаңа жаһандық сын-қатерлер жағдайында БҰҰ Бас хатшысы ұсынған жаңа қоғамдық шарт идеясының маңыздылығы арта түскеніне мән берді. Е.Қошанов Қазақстан оның идеясының әділеттілік пен ынтымаққа негізделген басты қағидаттарын толық қолдайтынын, ал парламенттер оның жүзеге асырылуында халық атынан өкілдік ететін институт ретінде басты рөл атқара алады деп есептейді.
"Әділеттілік Президентіміз Қасым-Жомарт Тоқаевтың саяси бағдарының идеялық негізі саналады. Оның көшбасшылығымен Әділетті Қазақстанды құруға бағытталған жүйелі саяси және экономикалық реформалар іске асырылуда. Бұл қоғамның саясатқа араласу мүмкіндігін кеңейтіп, әлеуметтік теңсіздікті азайтты. Инклюзияны дамытуға, денсаулық сақтау мен білімнің қолжетімді болуына, ұлттық байлықтың әділетті бөлінуіне айрықша назар аударылуда. Мұның бәрі Парламент қабылдап жатқан заңдарда көрініс тауып отыр", – деді ол.
Мәжіліс төрағасы қаржы секторының нақты өндірісті ығыстырып келе жатқанын көптеген шетелдік сарапшылар атап көрсеткенін айтты. Қазақстанда, керісінше, барлығына лайықты еңбек жағдайын жасап, кәсіби өсудің тең мүмкіндігін қамтамасыз етуге ерекше көңіл бөлінеді. Мемлекет басшысы 2025 жылды Жұмысшы мамандықтар жылы деп жариялады.
Қазақстан халықаралық деңгейде Орталық Азия мен Ауғанстан елдері үшін Орнықты даму мақсаттары бойынша БҰҰ-ның өңірлік орталығын Алматы қаласында құру бастамасын ұсынған болатын. Мәжіліс спикері шетелдік әріптестеріне тиісті қарарды бірауыздан мақұлдағаны үшін шынайы ризашылығын білдірді.
Екінші күні қатысушыларға Өзбекстан Президенті Шавкат Мирзиёев құттықтау сөзін арнады. Ол әлемде демократияны алға ілгерілеткені үшін Парламентаралық Одаққа ризашылығын білдірді.
Өзбекстан басшысы Орталық Азия елдері парламенттерінің спикерлерін қабылдап, өңірдегі парламенттер арасындағы өзара іс-қимылды күшейту жөніндегі басым бағыттарды талқылады.
ПАО аясында Мәжіліс спикері шетелдік әріптестерімен екі жақты кездесулер өткізді.
Ол Өзбекстанның Олий Мәжілісі Заң шығару палатасының спикері Нуриддин Исмоиловпен парламентаралық ынтымақтастықты арттыру мәселелерін талқылады.
Мәжілістің баспасөз қызметі. Сурет: Т.Таныбаев
