Цой ШҚО-да қаза тапқан дәрігерлердің отбасына көңіл айтты

Денсаулық сақтау министрі Алексей Цой Шығыс Қазақстан облысында жол-көлік оқиғасынан қаза тапқан жедел жәрдем дәрігерлерінің отбасыларына көңіл айтты, - деп хабарлайды Tengrinews.kz тілшісі.

"ҚР Денсаулық сақтау министрлігі ұжымының атынан және жеке өз атымнан Шығыс Қазақстан облысында жол-көлік оқиғасында қаза тапқан жедел жәрдем қызметінің дәрігерлері мен фельдшерлерінің отбасыларына қайғырып көңіл айтамын", - деп жазды министр Instagram-дағы парақшасында.

Оның айтуынша, бұл трагедия дәрігер болудың қаншалық қауіпті екенін көрсетті.

"Ауа-райының қолайсыздығына, жұмыстың ауырлығына, шаршағанына қарамастан, дәрігерлер өз кәсібін қашан да адал атқарады. Өкінішке қарай, науқас өмірін құтқаруға шыққан шұғыл қызмет бригадасының дәрігері мен фельдшері - Болат Қапсаметұлы Әзілханов пен Бейбіт Төлеуғазыұлы Ғабдуллин көз жұмды.

Қайғылы оқиға медицина қызметкерлерінің қауіпсіздігі жайлы тағы бір ойлануға түрткі болып отыр", - дейді Цой.

Ол қазір Семейдегі ауруханада жансақтау бөлімінде жатқан жедел медициналық жәрдем көлігі жүргізушісінің тезірек сауығып кетуін тіледі.

Еске салайық, 3 ақпанда Шығыс Қазақстан облысында тасжолдағы апаттан жедел жәрдем қызметкерлері қаза тапты. Жүргізуші Семей ауруханасына жеткізілді.

Сілтемесіз жаңалық оқисыз ба? Онда "ВКонтакте" желісінде парақшамызға тіркеліңіз!