+7 (777) 001 44 99
Қазақша
Русский
English
Редакцияның WhatsApp-нөміріне Түркістан облысы Арыс ауданының тұрғындары облыстық жолдың жағдайына шағымданып хабарласты, - деп хабарлайды Tengrinews.kz тілшісі.
Видеода асфальттың бұзылғаны, жолдағы шұңқырлар мен топырақ үйінділері анық көрінеді.
Жауапты мекеменің айтуынша, бұл жолмен жүру ережесін бұзған ауыр жүк көліктерінен пайда болған.
"Арыс ауданындағы КХ 92 облыстық жолы "Оңтүстік Жолдары" мекемесінің бақылауында. Аталған учаскедегі ақаулар инертті материалдарды (құм) белгіленген мөлшерден артық тасымалдайтын ауыр жүк көліктерінің жүйелі түрде жүруіне байланысты пайда болған", – деді мекеменің бас инженері.
Мәселе қашан шешіледі
Жолға жауапты мекеме бұл жол учаскесінің негізін кесек тастарды қолданып нығайту туралы шешім қабылдаған.
Қазіргі уақытта қажетті жол-құрылыс материалдарын дайындау жұмыстары жүргізіліп жатыр.
"Сонымен қатар, облыстық көлік инспекциясына бұл материалдарды тасымалдау кезіндегі заңбұзушылықтарды анықтап, жою туралы хаттар жолданды", – деді мекеме өкілі.
Жол төсемін қалпына келтіру жұмыстарын биылғы шілденің екінші онкүндігіне дейін аяқтау жоспарланған.
Артық салмақ жолды бүлдіреді
Көлік министрлігінің деректері бойынша, елде шамамен 60 мың жүк көлігі тіркелген. Статистика бойынша, солардың шамамен 40 мыңы инертті материалдарды артық жүкпен тасымалдайды.
Олардың салмағы асфальт жамылғысына рұқсат етілген жүктемеден шамамен екі есе асады. Мысалы, рұқсат етілген 25 тонна орнына, жүк таситын көліктер 35-40 тонна жүк тасымалдайды. Бұл жол төсемінің мерзімінен бұрын тозуына және жолдардың бұзылуына себеп болады.
Ауыр карьерлік көліктерден бөлек, жолдармен бетонараластырғыштар, автокрандар және басқа да ауыр техника қозғалады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
