"Астана Опера" театры Абайдың батасын алды

Бүгін Абай атындағы мемлекеттік академиялық опера және балет театрында "Астана Опера" театры гастрөлдік концертінің ашылу салатаны өтеді деп хабарлайды Tengrinews.kz. "Дәл бүгін "Астана Опера" театрының ашылғанына 8 ай толып отыр. Біз 80 жылдық тарихы бар Абай атындағы Мемлекеттік академиялық опера және балет театрына гастрөлдік сапармен келіп отырмыз. Бұл жай ғана сәйкестік емес деп есептеймін. Біз өзіміз көрермені болған, өзіміз қызмет істеген қарашаңыраққа, мұндағы өмірден өтсе де көңілдерден кетпеген театр тарландарының рухтарына тағзым етуге келдік. Бұл театрдың сахнасында аты аңызға айналған Күләш Бәйсейітова, Ермек Серкебаев, Роза Жаманова секілді қазақ операсының жарық жұлдыздары өнер көрсеткен", – деді "Астана Опера" театрының директоры Төлеген Мұхамеджанов. Алматыда өткен баспасөз конференциясында "Астана Опера" және Абай атындағы МАОБТ қызметтестік туралы меморандумға қол қойды. "Бұл біз үшін өте көңіл толқытарлық сәт. Біз осы гастрөлдік сапарды күткенімізге біраз уақыт болды. Бұл екі театр бір мәдени кеңістікте қатар жұмыс істейді, театрларымыздың арасында ешқандай бәсекелестік туралы тіпті сөз де қозғалуы мүмкін емес. Біз бәріміз әріптеспіз, жақын достармыз. Бұл кездесуді ұйымдастырудағы басты мақсат тәжірибелі театрдың жас театрға қолдау көрсетуі, жас театрдың бас театрдан бата алуы деп түсінген жөн", – деді Абай атындағы МАОБТ директоры Ғабит Несіпбаев. Меморандумға қол қойылғаннан кейін Ғабит Несіпбаев "Астана Опера" театрына белгілі қазақ опера жұлдыздарының портретін сыйлады. Гастрөлдік бағдарламаның алғашқы күнін Ресейдің халық әртісі Юрий Александровтың "Біржан-Сара" операсы ашады. 5 ақпан күні сағат 12.00-де жас көрермендерге белгілі компазитор Сергей Прокофьевтің "Петя және қасқыр" атты қазақ тіліндегі симфониялық ертегісі қойылады. Сол күні кешке сағат 19.00-де "Астана Опера" театрының симфониялық оркестрі концерт береді. 6 ақпан күні көрермен назарына үлкен Гала-концерт ұсынылады. 7 ақпан күні Қазақстан Республикасының еңбек сіңірген қайраткері Ержан Дәуітов жетекшілік ететін камералық хор өнер көрсетеді. 9 ақпан күні камералық залда камералық музыка концерті өтеді. Алматыдағы гастрөлдік сапары аяқталғаннан кейін "Астана Опера" Санкт-Петербургтегі Маринский театрына гастроөлдік сапарға аттанады. 8 наурызда Маринский театрының жаңа сахнасында Джузеппе Вердидің "Атилла" операсы, 9 наурызда "Біржан-Сара", П.Чайковскийдің "Ұйқыдағы ару" опералары қойылады.