+7 (777) 001 44 99
Қазақша
Русский
English
Ақтауда 28 қарашада із-түссіз жоғалып кеткен 14 жастағы Жұпар Абдуллаева желтоқсанның 2-сіне қараған түні табылды, - деп хабарлайды Tengrinews.kz тілшісі Маңғыстау облыстық ІІД баспасөз қызметіне сілтеме жасап.
Маңғыстау облыстық ІІД баспасөз қызметінің басшысы Әлия Шермағамбетованың мәлімдеуінше, қызды құқық қорғау органы қызметкерлері тапқан.
"Желтоқсанның 1-інен 2-сіне қараған түні сағат 01:00 шамасында үшінші ықшамауданда жолдан өтіп бара жатқан оны құқық қорғау органы қызметкерлері киімінен таныған. Қыздың айтуынша, ол қорыққандықтан үйіне оралмаған. Қыз бірер күн бұрын мектептегі сабағына бармаған. Сол үшін ата-анасы ұрсуы мүмкін деп қорыққан. Оған ештеңе болмаған, ол дұрыс отбасынан шыққан. Қалта телефонының батареясы отырып, сөніп қалған, ол жертөлелерде қонған, тамақтанбаған, тек дүкеннен сатып алған суды ғана ішкен", - дейді баспасөз хатшысы. Оның айтуынша, ата-анасы қыздарының табылғанына қуанышты және оған ұрыспайтындарын жеткізген.
Еске сала кетейік, бұған дейін Жұпар Абдуллаеваның 28 қарашада таңертең ерте үйден шығып, қайтып оралмағаны хабарланған болатын. Қыз мектепке баруы тиіс болған, бірақ мектеп басшылығы оның сабақта болмағанын айтқан.
