Астанада алты жасар бала өрт кезінде түтіннен уланып қайтыс болды, - деп хабарлайды Tengrinews.kz тілшісі қалалық Төтенше жағдайлар департаментінің баспасөз қызметіне сілтеме жасап.
"Жанарыс көшесі, 29-үй мекенжайындағы өрт туралы хабар 3 наурызда сағат 09.29-да келіп түсті. Өртсөндірушілер оқиға орнына сағат 09.39-да келгенде екіқабатты ғимараттың төменгі қабатындағы бөлмеаралық қалқалардың 15 шаршы метрінің жанып жатқаны белгілі болды", - делінген хабарламада.
Куәгерлердің айтуымен ғимараттың төменгі қабатында ата-анасымен бірге сол ғимаратта тұратын баланың бар екені анықталды.
"Өртсөндірушілер баланы іздеуге бірден кірісті, іздестіру жұмыстарының нәтижесінде төменгі қабаттағы дәретханадан тұншықтырғыш газдан уланып қайтыс болған 2009 жылғы баланың денесі табылды", - деп хабарлады департамент қызметкерлері.
Өртті сөндіруге бес техника мен 16 адам жұмылдырылды. Өрттің неден шыққаны анықталып жатыр.
