Қазақстандық әнші Ғалымжан Молданазар америкалық белгілі Break of Reality тобымен бірге "Ақпен бірге" әніне бейнебаян түсірді, - деп хабарлайды Tengrinews.kz тілшісі.
Америкалық Break of Reality рок-виолончельшілер тобы Қазақстанда алғаш рет 2015 жылдың наурызында Алматыдағы Жамбыл атындағы филармонияда өнер көрсеткен. Олар Қазақстан эстрадасында электропоп және синт-фанк жанрларында ән шырқап жүрген Ғалымжан Молданазармен сол кезде танысқан.
Осыдан кейін қазақстандық әнші мен Break of Reality Нью-Йорк қаласындағы алаңдардың бірінде бірге ән салды. Концертке АҚШ-та тұрып жатқан қазақстандықтар да қатысты. Олардың ішінде фотограф Қанат Бейсекеев те болды. Ол концерттен алған әсерін былай жеткізді: "Бұл шынымен де мақтануға тұрарлық үлкен жаңалық. Мен Нью-Йорк залында Ғалымжанға деген қошеметтің куәсі болдым. Адамдардың оны видеоға түсіріп, америкалық топтың біздің жерлесімізбен мақтанғанын көрдім. Бұл бағалауға тұрарлық еңбек", - деді ол.
